Ranking.kz ەسەبىنشە، وڭىرلىك بولىنىستە تابىسى ەڭ تومەنگى كۇنكورىس دەڭگەيىنەن اسپايتىن وتباسىلاردىڭ كوبى تۇركىستان وبلىسىندا تىركەلگەن، 27 مىڭ وتباسى. ودان كەيىن الماتى وبلىسى 98،1 مىڭ ادام، شىمكەنت – 76،8 مىڭ ادام.
حالىق شىنىمەن كەدەيلەنىپ بارا ما؟
Qamshy.kz اگەنتتىگىنە ەكونوميست ءسابيت رىسبايەۆ بىلاي جاۋاپ بەردى:
– بىزدە كەدەيلەنۋدىڭ ناقتى ستاتيستيكاسى قاراستىرىلماعان. ول ءۇشىن ناقتى ەسەپتى ءبىلۋ كەرەك. ەلىمىزدە ەڭ تومەنگى جالاقى مولشەرى ءوستى. باسقا دا جاعدايلار جاسالىپ جاتىر. ءبىزدىڭ بيۋدجەتتىڭ 70-80 پايىزىنان استامى الەۋمەتتىك سالالارعا كەتەدى. ءبىراق سونىڭ وزىندە كەدەيشىلىك ازايماي تۇر. سەبەبى، جالعان اقپاراتتار وتە كوپ. سونىڭ ءوزى كەدەيشىلىكتىڭ ارتۋىنا سەپتىگىن تيگىزۋدە. كىمنىڭ باي، كىمنىڭ كەدەي، كىمنىڭ اقشاسى كوپ، كىمدىكى از ەكەنىن ناقتى انىقتاي الماي جاتىرمىز. ويتكەنى بىزدەگى ستاتيستيكا وتىرىك. ينفلياسيانىڭ دەڭگەيىنە قاراي زەينەتكەرلەردىڭ، الەۋمەتتىك وسال توپتاعىلاردىڭ، تاعى باسقالارىنىڭ اقىسى، باسقا دا الەۋمەتتىك سالالارعا بولىنەتىن اقشانى ينفلياسيانىڭ دەڭگەيىنە قاراي كوبەيىپ وتىرۋ كەرەك. ادامدار ينفلياسيانى سەزبەي قالۋى ءتيىس. بىزدە رەسمي ينفلياسيا 7-8 بولعانىمەن، بەيرەسمي 25-30 بولادى دا، حالىق ينفلياسيانى قۋىپ جەتە الماي كەلەدى. ەندەشە ەڭ الدىمەن ناقتى ينفلياسيانى انىقتاۋ كەرەك.
بايلاردىڭ بايي تۇسەتىنى، كەدەيدىڭ كەدەيلەنە بەرەتىنى – كاپيتاليزمنىڭ باستى زاڭدىلىعى. دەسەك تە، ءار مەملەكەت ءوز باعىتتارىن ايقىنداپ الادى. ءبىز دە الەم ەلدەرى سەكىلدى ماقساتىمىزدى ايقىنداپ الۋىمىز كەرەك. مىسالى، جۇڭگو سوڭعى 30 جىلدان بەرى كەدەيلىكپەن كۇرەسىپ، ونىڭ الدىن الىپ كەلەدى. ال بىزدە كەدەيلەر سانى جىلدان جىلعا كوبەيىپ كەلدى. ينفلياسيا وسكەن سايىن حالىق تابىسىنىڭ بارعان سايىن كوپ بولىگى ازىق-تۇلىككە كەتەدى، – دەيدى ول.
سونىمەن قاتار ەكونوميست سوڭعى جىلدارى نەسيە، اۆتونەسيە مەن يپوتەكانىڭ پايىزى ءوسىپ كەتكەندىكتەن حالىق اقشاسىن ەشتەڭەگە جەتكىزە الماي جاتقانىن جەتكىزدى. قازاقستاندا قىتايداعىداي قاپتاعان زاۋىت جوق. بيلىك جۇمىس ورنىن اشامىز دەپ كاسىپكەرلىكتى دامىتۋعا تىرىسىپ جاتقانىمەن، نەگىزگى اقشا كولدەنەڭ بىرەۋلەردىڭ قالتاسىنا كەتۋدە. سۋبسيديا جاعىندا دا سولاي. ماسەلە كوپ، وڭتايلى شەشىم جوق. ال قارا حالىق شىنىمەن كەدەيلىككە كەلە جاتىر.
پىكىر قالدىرۋ