مينيستر زاڭ ورگاندارى مەن بۇقارالىق اقپارات قۇرالدارىنا بۇنداي جاڭالىقتاردى ابايلاپ تاراتۋ كەرەك ەكەنىن ەسكەرتىپ ءوتتى. سەبەبى باياندامادا حيدجاب دەگەن ءسوز ايتىلماعانىن، بەتتى تۇمشالاۋ دەپ نيكاب پەن پارانجانى مەڭزەگەنىنە سەندىرۋگە تىرىستى.

– بەتتى جابۋ ازاماتتىڭ ءتۇر-تۇلعاسىن انىقتاۋعا قيىندىق كەلتىرەدى. بۇل ەڭ ءبىرىنشى كەزەكتە بىزگە قاۋىپسىزدىكتى قامتاماسىز ەتەدى.  وركەنيەتتى ەلدەردىڭ بارلىعىندا وسى شەكتەۋ بار. مەملەكەت ەشقاشان زايىرلىلىقتان، ءدىني سەنىم بوستاندىعىنان تايمايدى. ويتكەنى بۇل اتا زاڭدا جازىلىپ تۇر،– دەدى مينيستر. 

جاڭا زاڭ ۇكىمىنە الاڭداعان حالىق مينيسترلىككە رەسمي جولداۋ جاساپ، پەتيسيا جازىپ ۇلگەرگەن. بۇنىڭ ءبارى دە ءتيىستى ۋاكىلەتتى ورگانداردا قارالماق.

 – مينيسترلىكتە قوعامدىق، ساراپتامالىق كەڭەستەر بار. زاڭنامالىق وزگەرىستەردى تالاپ ەتەتىن بارلىق ماسەلەلەر الدىمەن ساراپشىلار مەن قوعام اراسىندا تالدانادى، سودان كەيىن عانا ناقتى شارالار قولعا الىنادى. ودان باسقا، قوعامداعى تۇراقتىلىق پەن قاۋىپسىزدىكتى ساقتاۋ ءۇشىن قاجەتتى شارالاردى قابىلداۋ – ۋاقىت تالابى. ءبىزدىڭ باستى ماقساتىمىز ەل بىرلىگى مەن تۇراقتى دامۋ. ەل قاۋىپسىزدىگىنە مەملەكەت قانا ەمەس، ءاربىر ادام جاۋاپتى ەكەنىن ءتۇسىنۋى ءتيىس. بۇنىڭ ىشىندە اقپاراتتى دۇرىس تاراتۋ ماسەلەسى دە كىرەدى، – دەدى ايدا بالايەۆا.

ەسكە سالا كەتەيىك، بۇعان دەيىن قازاقستاندا حيدجاب پەن باسقا دا ءدىني كيىمدەردى قوعامدىق ورىنداردا كيۋگە تىيىم سالىنعانى ايتىلعان ەدى. بۇل تەرميندى شاتاستىرىپ ايتقان ءمينيستردىڭ قاتەلىگى الدە ب ا ق بەتىندە ونسىز دا قوعامدا ءورشىپ تۇرعان ءدىني ماسەلەنى قيىنداتۋعا جاسالعان ارەكەت بولدى.

قالاي بولعاندا دا ءداستۇرلى باعىتتاعى ورامال تاعاتىن قىزدارىمىزعا كەسىرى ءتيىپ كەتپەۋى كەرەك. كوپشىلىك ەكى تاراپتىڭ ايىرماشىلىعىن سىرتتاي ۇعىنا المايدى. زاڭدى جۇزەگە اسىرامىن دەپ «شاش ال دەسە، باس الاتىندار» تابىلىپ قوعامدا ءتارتىپ ورناتۋشىلار دا تابىلماسىنا كىم كەپىل؟ ءدىني جاعداي اسقىنعان شەت ەلدەردە قىز بالالار كوشەدە ەركىن جۇرە المايتىن دەڭگەيگە جەتكەن.

جالپى «حيدجاب» دەگەن ءسوز قازاقتا جوق، ورامال بار. ءبىرىنشى كەزەكتە وسى تەرميننىڭ ءوزىن قولدانىستان شىعارۋىمىز كەرەك. «مەن حيدجاب كيەمىن» دەپ الىپ، «ۇستىڭدەگى ارابتىڭ كيىمى» دەگەنگە نەگە رەنجيدى؟! نامازدىڭ اتاۋىن دا اقشام، قۇپتان دەپ قازاقشالادىق، ءبىراق نارازىلىق تۋدىرىپ جۇرگەن وسى ءسوز بەن كيىمنىڭ ماعىناسىن، تالابىن ۇعىنباي ەش ناتيجەگە جەتە المايمىز، سودان داۋدىڭ ۇستىنەن داۋ تۋادى.