«Alma school» كاسىپكەرلىك ءبىلىم بەرۋ مەكتەبىنىڭ جاڭا عيماراتىنداعى كىتاپحاناعا كورنەكتى قالامگەر، كەمەڭگەر تۇلعا مۇحتار اۋەزوۆتىڭ ەسىمى، كونفەرەنس-زالعا مەملەكەت جانە قوعام قايراتكەرى، عالىم دىنمۇحامەد قونايەۆتىڭ، سونداي-اق كونفەرەنس-حولعا قازاقستاننىڭ حالىق ءارتىسى، كومپوزيتور ەسكەندىر حاسانعالييەۆتىڭ ەسىمى بەرىلدى.

ءىس-شاراعا ەلگە ەڭبەگى سىڭگەن قۇرمەتتى ازاماتتاردىڭ ۇرپاقتارى شاقىرىلدى.

بەلگىلى قوعام قايراتكەرى، ديپلومات مۇرات اۋەزوۆ، دىنمۇحامەد قونايەۆتىڭ جيەنى، جازۋشى ديار قونايەۆ، ەسكەندىر حاسانعالييەۆتىڭ جۇبايى داريكو سوپىجانوۆنا جانە ق ر ەڭبەك سىڭىرگەن قايراتكەرى ءبىرجان حاسانعالييەۆ ارنايى كەلىپ قاتىسىپ، جىلى لەبىزدەرىن ءبىلدىردى.

– مۇحتار اۋەزوۆ ناعىز كلاسسيككە اينالعان جازۋشى. بۇل حالىقتىڭ بەرگەن باعاسى. كلاسسيكتىڭ ەسىمى زامانعا بايلانباعان. كەرىسىنشە، زامان كلاسسيكتەن قورقادى. وسىنداي بيىك رۋحپەن ءومىر سۇرگەن، ناتيجەلى ەڭبەك ەتكەن تۇلعانىڭ ەسىمى كىتاپحاناعا بەرىلگەنىندە ايرىقشا ءمان بار دەپ سانايمىن. جاستارىمىزدىڭ ءبىلىم الۋعا دەگەن زەيىنى اشىلسىن، – دەپ مۇرات اۋەزوۆ مەكتەپتىڭ باستاماسىن قۇپتايتىنىن ايتتى.

– دىنمۇحامەد قونايەۆتىڭ ەسىمىن قاستەرلەپ، مەكتەپتىڭ ءبىر بولشەگىن اتاعانىنا قۋانىشتىمىن. كونفەرەنس-حولدا قونايەۆتىڭ ءومىرى مەن قىزمەتى، ەل ءۇشىن سىڭىرگەن ەڭبەگى جايىندا ۇلكەن جيىندار ءوتىپ، جاستارعا ناسيحات جۇرگىزىلەدى، دەپ سەنەمىن. ءالى كۇنگە دەيىن ەسىمىن ەستەن شىعارماي، ەل بولىپ ارداق تۇتىپ كەلە جاتىر. مۇنىڭ ءبارى سول كوزى تىرىسىندە اتقارعان ۇلكەن ىستەرىنىڭ جەمىسى. مۇحتار اۋەزوۆ اتىمەن كىتاپحانا اشىلعانى دا ۇلكەن قۇرمەت. قانشا دەگەنمەن سول كىسىنىڭ ۇرپاعىمىز، ونىڭ ۇستىنە مۋزەي-ۇيى مەنىڭ باسشىلىعىمدا. مەكتەپ وقۋشىلارى ۇلى جازۋشى اتامىزدىڭ كىتاپتارىن وقىسا، تانىسا دەيمىز. ەر ەسىمى ەل ەسىندە ساقتالسا بولعانى، – دەيدى ديار قونايەۆ.

مەكتەپ باسشىلىعىنىڭ ايتۋىنشا، قازاقتىڭ كورنەكتى تۇلعالارى – مۇحتار اۋەزوۆ پەن دىنمۇحامەد قونايەۆتىڭ ەسىمى كىتاپحانا مەن كونفەرەنس-زالعا بەرىلۋى "Alma School" مەكتەبىنىڭ وقۋشىلاردى جان جاقتى دامىعان، كوكجيەگى كەڭ تۇلعا ەتىپ ءوسىرۋ ءۇشىن جانە قازاقتىڭ داڭقتى ازاماتتارىن، ولاردىڭ شىعارماشىلىعى مەن ەڭبەك جولىن جاس ۇرپاقتىڭ اراسىندا ناسيحاتتاۋ ماقساتىنان تۋىنداعان يدەيا. اتاقتى كومپوزيتور، «اتامەكەن» پاتريوتتىق ءانىنىڭ اۆتورى ەسكەندىر حاسانعالييەۆتىڭ اتىنا كونگرەسس-حولدى بەرۋدەگى ويىمىز – شىعارماشىل جاستاردى دامىتۋعا قوسقان ۇلەسى ەكەنىن جەتكىزدى.