كەشە عانا ەنەرگەتيكا ءمينيسترى الماسادام ساتقالييەۆ «سۇيىتىلعان مۇناي گازىنىڭ باعاسى نارىققا ساي ەمەس» دەپ، جۇرگىزۋشىلەرگە كولىكتەرىن گازعا اۋىستىرماۋعا كەڭەس بەرىپتى.

– قازاقستاندا اۆتوگاز باعاسى تىم تومەن، بۇلاي ۇزاق تۇرمايدى. جۇرگىزۋشىلەرگە كولىگىن گازعا اۋىستىرماۋعا كەڭەس بەرەمىن. ويتكەنى گاز باعاسى تەك وسە بەرەتىن بولادى. مينيسترلىك باعانىڭ كۇرت وسۋىنە جول بەرمەيدى. ءبىراق ەگەر ەكسپورت تاپشىلىعى تۋىنداسا، وندا اۆتوگاز باعاسى ەكسپورتتىق باعاعا ساي بولادى، دەپتى.

مينيستر ايتىپ بولماي-اق ەلدەگى گاز باعاسى كۇرت كوتەرىلدى. ءقازىر جانارماي بەكەتتەرىندە ۇزىن-سونار كەزەك.

«گازدىڭ ۇستىندە وتىرىپ، گاز تاپشى دەگەندى قالاي تۇسىنۋگە بولادى؟ سايلاۋ وتكىزۋگە 20 ملرد اقشا تابادى دا، حالىقتى گازبەن قامتاماسىز ەتۋگە كەلگەندە دەفيسيت، قارجى جوق، دەگەندەي نەشە ءتۇرلى سىلتاۋ ايتا باستايدى. قىزىلوردادا سۇيىتىلعان گازدىڭ تاپشىلىعى قاتتى سەزىلىپ جاتىر. گاز قۇيۋ بەكەتتەرىندە كولىك كەزەگى كوپ. وندا دا تالونمەن بەرەدى، نەمەسە 1500-2000 تەڭگە كولەمىندە ليميت قويىلعان»، دەگەن شاعىمىن ايتتى وقىرمانىمىز قانات ەسپاي. 

100 جىلعا جەتەتىن قورى بار ەلدە گاز تاپشى! 

ءمينيستردىڭ مۇنىسى – گاز تاپشى بولسا بەنزينمەن ءجۇر، سۋ تاپشى بولسا سۋ ىشپەڭدەر، دەگەننىڭ كەرى. بيلىك گاز باعاسىنىڭ ءوسۋى قارالى قاڭتارعا الىپ كەلگەنىن ۇمىتقان ەكەن.

– ءقازىر كوپشىلىكتەن گاز تاپشىلىعىنا قاتىستى شاعىمداردى ءجيى ەستيمىن. اسىرەسە، استانا قالاسى بويىنشا گاز جوق دەيتىندەر كوپ. بۇل ماسەلە ءبىزدى دە الاڭداتۋدا. ەلدە گاز تاپشى ەكەنىن ەنەرگەتيكا ءمينيسترى مويىنداپ وتىر. قازان ايىندا 124 مىڭ توننا سۇيىتىلعان گاز تۇتىنۋ كەرەك بولساق، ونىڭ نورماسى 144 مىڭ تونناعا جەتىپتى. مىنە، وسىنىڭ سالدارىنان جەتىسپەۋشىلىك بايقالادى-مىس. مينيستر بولسا، گاز تاپشىلىعى بولماس ءۇشىن گازبەن جۇرەتىن كولىكپەن جۇرمەڭدەر دەيدى. ۇكىمەت باسىنداعىلار «قاڭتار وقيعاسى» وسى گاز باعاسىنىڭ كوتەرىلۋىنەن باستالعانىن ۇمىتىپ بارا جاتقانداي. قىمباتشىلىققا جول بەرۋگە بولمايدى، – دەيدى دەپۋتات داۋلەت مۇقايەۆ.

Qazaqgaz ۇلتتىق كومپانياسىنىڭ ءتوراعاسى سانجار جاركەشوۆ گاز تاپشىلىعىن ماسەلەسىن شەشۋ ءۇشىن تۇتىنۋ كولەمىن ازايتۋ كەرەك دەيدى. ياعني، ونىڭ پىكىرىنشە، حالىق ىسىراپشىلدىققا جول بەرىپ جاتىر.

ەل وڭىرلەرىندە اۆتوگازدىڭ قانشالىقتى قىمباتتاعانى تىركەلدى دەسەك،

• استانادا ليترىنە 70 تەڭگەدەن 76 تەڭگەگە،
• الماتىدا 75 تەڭگەدەن 81 تەڭگەگە،
• شىمكەنتتە 60 تەڭگەدەن 64 تەڭگەگە،
• شىعىس قازاقستان وبلىسىندا 70-75 تەڭگەدەن 76-81 تەڭگەگە
• اتىراۋ وبلىسىندا 50-55 تەڭگەدەن 54-59 تەڭگەگە،
• الماتى وبلىسىندا 75-80 تەڭگەدەن 81-86 تەڭگەگە،
• سولتۇستىك قازاقستان وبلىسىندا 75-80 تەڭگەدەن 81-86 تەڭگەگە،
• ماڭعىستاۋ وبلىسىندا 50-55 تەڭگەدەن 54-59 تەڭگەگە دەيىن قىمباتتادى. 

بيلىك تاراپىنان گاز تاپشىلىعى ماسەلەسى شەشىلمەسە، حالىقتىڭ اشىنىپ تاعى ءبىر رەت كوشەگە شىعۋى عاجاپ ەمەس.