جازۋشىلار وداعىنىڭ بارىندا كوفە ءىشىپ وتىرمىز.

ءاتى-جونى ەسىمدە جوق، ءبىر جىگىت اسەكەڭنەن (اسقار سۇلەيمەنوۆ):

– اس-ەكە، قازاق ۇلت بولا ما، بولماي ما؟ – دەپ سۇرادى. اسەكەڭ ءارى كوفەسىن ءىشىپ، ءارى قولىنداعى گازەتتەن كوز الماي وتىرىپ:

– بولادى. ءبىراق بولمايدى، – دەدى دە گازەتتەن كوزىن الماي وتىرا بەردى. 

ءبىز تۇك تۇسىنگەن جوقپىز.

– اسەكە، تاراتىپ ايتساڭىزشى. نە ول – بولادى، ءبىراق بولمايدى دەگەن. نەگە بولادى، نەگە بولمايدى.

اسەكەڭ سۇراق قويىپ وتىرعان جىگىتكە باجىرايىپ ءبىر قارادى دا:

– سوعان ميلارىڭ جەتپەي تۇر ما؟ بولادى، ەگەر رۋعا بولىنگەنىن قويسا. ءبىراق، قازاق رۋعا بولىنگەنىن قويمايدى. دۇنيەدە ەكى-اق قازاق قالعان بولسا، ولار ءبىر-بىرىنىڭ رۋىن سۇراپ بارىپ ولەدى. دەمەك، ولار ۇلت بولا المايدى.

(قازاقستاننىڭ حالىق جازۋشىسى دۋلات يسابەكوۆتىڭ 

"دۋلات يسابەكوۆتىڭ انەكدوتتارى" كىتابىنان).