الماتىدا حالىق كوبەيگەن سايىن قوعامدىق كولىكتىڭ تاپشىلىعى سەزىلىپ جاتىر. بيۋدجەتتەن تاعى 46 ملرد تەڭگە قاراستىرىلىپ، تاعى 600 اۆتوبۋس ساتىپ الۋ جوسپارلانىپتى. قولدانىستاعى كولىكتەردىڭ ءبىرازى «اۆتوبۋس زيراتىنا» تاستالىپ، ورنىنا جاڭاسىن الماق.

«اۆتوبۋس زيراتىندا» 800-دەن استام اۆتوبۋس تۇر. ەڭ ەسكىسى 2010 جىلى، جاڭالارى 2018 جىلى اكەلىنگەن. نە دەگەن ساپاسىز تەحنيكا دەسەڭىزشى. بۇل اۆتوبۋستار جۇرۋگە جارامسىز جانە جوندەۋگە كەلمەيدى ەكەن.

"الماتىەلەكتروترانس" ج ش س باس ديرەكتورىنىڭ ورىنباسارى ابىلايحان ومارحان ساتىپ الىناتىن اۆتوبۋستاردىڭ جوندەۋگە جارامسىز ەكەنىن ايتقان. الداعى ۋاقىتتا بۇل تەحنيكانىڭ ءبارى ەسەپتەن شىعارىلادى. لياز ماركالى 200-دەي اۆتوبۋس 2017-18 جىلدارى ساتىپ الىنعان. ونىڭ 154 داناسى الماتى وبلىسىنا بەرىلگەن بولاتىن.

قىزىق، جىل سايىن اۆتوبۋس ساتىپ الۋدان جالىقپايدى، ءبىراق سوندا دا قاشان قاراساڭ اۆتوبۋس تاپشى. ساياساتكەر سانجار بوقايەۆ مۇنى جۇيەلى جەمقورلىق دەپ باعالايدى:

– باۋىرجان بايبەك الماتىعا اكىم بولعان كەزدە اۆتوبۋس جانە تروللەيبۋس اۆتوپاركىن «Green bus سompany» اتتى شىمكەنتتىك كۇماندى ءبىر كومپانياعا تابىستاعان. كەيىن ترامۆاي جولىن جويىپ، 1113 جاڭا اۆتوبۋستى جوعارى باعامەن ساتىپ الدى. قۇنى 83 400 دوللار سۇراتىن كولىكتىڭ باعاسى بىزگە كەلگەندە بەلگىسىز سەبەپپەن 164 000 دوللار بولىپ كەتەدى. سولاي 200 اۆتوبۋس ەكى ەسە قىمبات باعاعا ساتىپ الىندى. 2019 جىلى بۇلار ەسەپتەن شىعارىلىپ، سول جىلى قايتادان الدىرتادى. سول جاپ-جاڭا اۆتوبۋستار دا ەكى جىلدان كەيىن جارامسىز دەپ تابىلعان. كومپانيا كەيىن بانكروت دەپ تانىلىپ، ۇكىمەتكە ءبىر تيىن دا قايتارمادى. شەتەلدىك تاجىريبەگە سۇيەنسەك، ءبىر اۆتوبۋس كەمىندە 7 جىل قىزمەت ەتۋگە جارايدى. ال بىزدە جوندەۋگە بەرىلمەي، تىكەلەي تۇراققا جىبەرىلەدى، دەيدى ول.