اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ-ينتەرناتىندا «KazAgroFeed» كومپانياسىنىڭ دەمەۋشىلىگىمەن ءداستۇرلى V رەسپۋبليكالىق «ءدىلمار» شەشەندىك ونەر بايقاۋى ءوتتى.

ۇلتتىق رۋحاني مۇرامىزدى ۇلىقتاۋ ماقساتىندا ۇيىمداستىرىلىپ جاتقان كەزەكتى ءسوز دوداسىنا ەلىمىزدىڭ 12 وبلىسى مەن 3 ءىرى قالاسىنان (الماتى، استانا، شىمكەنت) جانە نازاربايەۆ زياتكەرلىك مەكتەبىنەن 24 وقۋشى قاتىسىپ، اقىل-ويى مەن سويلەۋ شەبەرلىگىن سىننان وتكىزدى.

بايقاۋ وقۋشىلارعا ءسوز ونەرىنىڭ ەرەكشەلىگى مەن جۇيەلى ءسوز ساپتاۋ شارتتارىن مەڭگەرتۋ، ساۋاتتى ءارى جاتىق سويلەۋ داعدىسىن – سويلەۋ مادەنيەتىن جۇيەلەۋ، ءسوز ونەرىنىڭ تاريحي-مادەني بولمىسىن تانۋ، ءسوز قۇندىلىعىن باعالاۋ، ۇلتتىق تاربيە بەرۋ، سول ارقىلى ادەبي ءتىل نورماسىنا سايكەس مەملەكەتتىك ءتىلدى قولدانۋدىڭ جاڭا دەڭگەيىن قالىپتاستىرۋعا باعىتتالدى.

رەسپۋبليكالىق بايقاۋعا «دارىن» رعپو-نىڭ پەداگوگيكالىق شەبەرلىك جانە پسيحولوگيالىق قىزمەت ءبولىمىنىڭ باسشىسى باقتيار سايران باكەن ۇلى قاتىسىپ، قۇتتىقتاۋ ءسوز سويلەدى. اقىن، سازگەر، شەجىرە-شەشەن، ۇلت جاناشىرى، تالعار اۋداندىق مەملەكەتتىك ءتىلدى وقىتۋ ورتالىعىنىڭ ديرەكتورى داركەمباي كامىنۇر ءتالىم ۇلى، سۇلەيمەن دەميرەل ۋنيۆەرسيتەتىنىڭ پروفەسسورى، عالىم جۇماقايەۆا بەرەكە داۋلەتحان قىزى جانە م. اۋەزوۆ اتىنداعى ادەبيەت جانە ونەر ينستيتۋتىنىڭ ابايتانۋ جانە جاڭا ءداۋىر ادەبيەتى ءبولىمىنىڭ عىلىمي قىزمەتكەرى، PhD دوكتورانت جۇماتايەۆا ايدانا نىشانعالي قىزى قازىلىق جاساپ بارلىق قاتىسۋشىعا باعىت پەن شابىت بەردى.

ءسوز دوداسىنا قاتىسۋشىلار ءوزارا جۇپتاسىپ، جەرەبە نەگىزىندە تاڭدالعان تاقىرىپتار بويىنشا وي ءوربىتتى. ولاردى باعالاۋدا وي قيسىنىن ساقتاي وتىرىپ، جىلدام ءارى ساۋاتتى پىكىر ءبىلدىرۋ، ءسوز تاپقىرلىعى، لوگيكالىق جۇيەلىك، ءسوز كوركەمدىگى، ءتىل تازالىعى، تاقىرىپتى اشا ءبىلۋى سىندى كريتەرييلەر نەگىزگە الىندى.
ناتيجەسىندە 8 وقۋشىعا جۇلدەلى ورىن، 4 وقۋشىعا ارنايى جۇلدە تابىستالدى. 4 وقۋشى – شايكىبەكوۆا نۇراي (پاۆلودار وبلىسى)، اۋعانباي اسەل (ماڭعىستاۋ وبلىسى)، نۇرجان قىزى اقەركە (الماتى وبلىسى)، ايگەرىم ارسلانبەك قىزى(اباي اتىنداعى رممي) ارنايى جۇلدەنى (20 مىڭ تەڭگە)؛ 4 وقۋشى – ابديحاي جانبولات (شىمكەنت قالاسى)، نۇباراق ۇلى اباي (الماتى وبلىسى)، ونداسىن قىزى ءاسيا (اقتوبە وبلىسى)، اسقار قىزى اقبوتا (جامبىل وبلىسى) جۇلدەلى ءىىى ورىندى (40 مىڭ تەڭگە)؛ 2 وقۋشى – جاپاس اياۋلىم (اباي اتىنداعى رممي)، ۇمبەتقالي بەكارىس (باتىس قازاقستان وبلىسى) جۇلدەلى ءىى ورىندى (70 مىڭ تەڭگە)؛ جاباعييەۆا ۇممىگۇلسىم (سەمەي قالاسى، نازاربايەۆ زياتكەرلىك مەكتەبى) جۇلدەلى ءى ورىندى (100 مىڭ تەڭگە) الدى.

ال باس جۇلدە مەن(150 000₸) ارنايى كۋبوكتى اباي وبلىسى، اياگوز اۋدانىنداعى #10-گيمنازيانىڭ 10-سىنىپ وقۋشىسى، رەسپۋبليكالىق “ءدىلمار” شەشەندىك ونەردى دامىتۋ كلۋبىنىڭ مۇشەسى، “دىلمار-اياگوز” شەشەندىك ونەر ۇيىرمەسىنىڭ جەتەكشىسى ءتۇرسالىم ءالي مۇحتار ۇلى يەلەندى. سونىمەن قاتار، قالعان وقۋشىلارعا سەرتيفيكاتتار مەن كىتاپتار تارتۋ ەتىلدى.

جوبا اۆتورى: رەسپۋبليكالىق اباي مەكتەبىنىڭ ءمۇعالىمى، جۋرناليست جارقىن سالەن ۇلى.