رەسەيدىڭ مەملەكەتتىك دۋماسىنىڭ دەپۋتاتى، ارانداتۋشى ەۆگەنيي فەدوروۆ تاعى دا قۇسىپتى.

ول «قازاقستان تاۋەلسىز ەل بولا الادى، ءبىراق ناتو-عا كىرمەۋى كەرەك» دەي وتىرىپ، «حالىقارالىق قۇقىققا سايكەس، قازاقستان كەڭەس وداعىنان شىققان جوق. بۇل زاڭدى فاكت، باسقا ەشتەڭە جوق. ايتپاقشى، قازسسر بەلگىلى ءبىر وكىلەتتىك پەن مارتەبەگە يە ەمەس، مەملەكەت قۇرامىنداعى مەملەكەت بولدى. رەسەي تاۋەلسىز قازاقستانمەن بەلگىلى ءبىر گەوساياسي شەكتەۋلەر قويىپ ارالاسۋى كەرەك دەپ ەسەپتەيمىن. ونىڭ تاۋەلسىز بولۋعا، مەملەكەتتىلىككە يە بولۋعا تولىق قۇقىعى بار. قانداي شەكتەۋلەر؟ مىسالى، ناتو-عا كىرمەسىن. رەسەيگە قارسى اسكەري سيپاتتاعى حالىقارالىق ماسەلەگە ارالاسپاسىن»، دەپتى دەپۋتات.

بۇل – فەدوروۆتىڭ جاساعان ءبىرىنشى مالىمدەمەسى ەمەس. بۇعان دەيىن دە ول ارىپتەسى ۆياچەسلاۆ نيكونوۆتىڭ قازاقستانعا قاتىستى «سولتۇستىك قازاقستان – رەسەيدىڭ قازاقستانعا بەرگەن سىيلىعى» دەگەن پىكىرىن قولداپ: قازاقستان «سىيلىق المادىم» دەپ ەسەپتەسە، وندا باسقاشا سويلەسۋ كەرەك. رەسەي زاڭسىز جولمەن الىنعان نارسەنى قايتارۋدى تالاپ ەتۋگە ءماجبۇر بولادى» دەگەن پىكىر بىلدىرگەن بولاتىن.

ارتىنشا رەسەي دەپۋتاتتارىنىڭ پىكىرلەرى ۇلكەن داۋعا ۇلاسىپ، رەسەيلىكتەر اراسىندا ساۋالناما جۇرگىزىلدى. ناتيجەسىندە، رەسپوندەنتتەردىڭ 36 پايىزى قازاقستاننىڭ عانا ەمەس، كوپتەگەن تمد ەلدەرىنىڭ اۋماعىن دا «سىيلىق» دەپ سانايدى ەكەن. تاعى 25%-ى بۇل تۇجىرىم «ساياسي تۇرعىدان دۇرىس ەمەس» ەكەنىن ايتقانىمەن، دەپۋتاتتىڭ سوزىنە قوسىلاتىنىن بىلدىرگەن.

كۇنى كەشە ءماجىلىس وتىرىسىندا دەپۋتات مارات ءباشىموۆ قازاقستاننىڭ ەگەنمەندىگى مەن اۋماقتىق تۇتاستىعىنا قاتىستى جالعان، ارانداتۋشىلىق مالىمدەمەلەرىمەن بەلگىلى بولعان فەدوروۆتىڭ تاعى دا «حايپ» جاساپ وتىرعانىن ايتادى. ونىڭ پىكىرىنشە، بىرىنشىدەن، ول سەپاراتيزم ءۇشىن لايىقتى تۇردە سوتتالعان «پەتروپاۆلدىڭ حالىقتىق كەڭەسى» دەپ اتالاتىن جيىنعا قاتىسۋشىلارعا شىققان سوت ۇكىمىنە رەنجۋلى. ەكىنشىدەن، ول قازاقستاندى «تولىق قۇقىقتىق سيپاتتاعى اۋماق» دەپ اتادى.

– مەملەكەتتىك دۋما دەپۋتاتىنىڭ 13 جاستاعى بالا سەكىلدى ارانداتۋشىلىق ارەكەتتەرىنە تۇسىنىكتەمە بەرۋ قيىن. ءارى فەدوروۆتىڭ ءسوزى تاريحقا قايشى كەلەدى. ول فاكتىلەردى دورەكى تۇردە قولدانىپ، كسرو-نىڭ ىدىراۋ پروسەسى قالاي وتكەنى تۋرالى ادەيى ءۇنسىز قالادى. سونىمەن بىرگە، فەدوروۆ ءوز پرەزيدەنتىنىڭ رەسمي ساياساتىنا قارسى، – دەيدى ماجىلىسمەن.

ارانداتۋدىڭ اتى ارانداتۋ. رەسەيدىڭ مەمدۋما دەپۋتاتتارى مەن ساياساتكەرلەرى  قازاقستانعا قاتىستى نەبىر سوراقى مالىمدەمەلەر جاساسا دا، قازاقستان بيلىگى ونىڭ بارىنە «بۇل كرەملدىڭ رەسمي ۇستانىمى ەمەس» دەپ قاراپ، كوز جۇمىپ كەلەدى.