بيىل دا قىس كەلە سالىسىمەن قازاقستاننىڭ ءار ايماعىندا اپات باستالدى. جىلىتۋ جۇيەلەرى جارىسقا كىرىسكەندەي كەزەك-كەزەك ىستەن شىعىپ، جىلداعى جاعداي تاعى قايتالانۋىن باستادى. حالىق اشۋلى.
جەرگىلىكتى بيلىكتەردىڭ جاز بويى اي قاراپ كەلگەنى مە، قىس تۇسكەلى بەرى ستەپنوگورسك، ەكىباستۇز، اقتاۋ، بالقاش، تەمىرتاۋ، ريددەر مەن جاڭاوزەندە جىلۋ جۇيەلەرى ىستەن شىعىپ، شۇعىل جوندەۋدى تالاپ ەتتى.
جاڭاوزەن قالالىق اۋرۋحاناسىنىڭ اۆتونومدى قازاندىعى بۇزىلىپ، جاڭا بوسانعان ايەلدەر سۋىقتا جىلۋسىز جاتتى. ولارعا جىلىتقىش قولدانۋعا رۇقسات بەرمەگەن.
"پەرزەنتحانادا جەل سوعىپ، پەردە قوزعالىپ تۇر. تەرەزەلەردى كورپەمەن بىتەپ قويعان. مۇنداي سۋىققا شىداۋ مۇمكىن ەمەس. بۇعان دەيىن باسقا پالاتادا بولدىق، مۇندا جىلىراق بولعاندىقتان، ءبىزدى وسىندا اۋىستىردى. جىلىتقىش سۇراپ ەدىك، پەرزەنتحانانىڭ ەلەكتر كەرنەۋى شىدامايتىنىن ايتىپ، ونى قولدانۋعا تىيىم سالدى. بالالارمەن وسىندا جاتىرمىز. مۇندا جاڭا تۋعان نارەستەلەر مەن جاڭا بوسانعان ايەلدەر جاتىر"، – دەيدى Instagram-دا ۆيدەوسى تاراعان جاڭاوزەندىك ءبىر ايەل.
وسى پەرزەنتحانادا بوسانعان ايەلدەر بىلتىر قاڭتاردا ءدال وسىلاي جىلۋ ءوشىپ قالعانىن، كراننان قاشان دا تەك سۋىق سۋ اعاتىنىن جارىسا جازدى. ءاليا تىلەۋ دەيتىن ايەل قىستا سول پەرزەنتحانادا بوسانىپ، سۋىقتان نارەستەسى پنيەۆمونياعا شالدىققانىنا شاعىمدانادى.
كۇنى كەشە ريددەردە كابەل ءۇزىلىپ، قازاندىق جۇمىسى توقتادى. تەمىرتاۋدا قارگرەس-1-دە باگەر ناسوس اپاتتان كەيىن اجىراتىلعان.
جىل سايىن قازاقستان قالالارىنىڭ تۇرعىندارى «قۇدايىم، وسى قىستان امان الىپ شىقسىنشى» دەپ تىلەيتىن بولدى. اقتاۋلىقتار دا قالاداعى بىتپەيتىن اپاتتارعا، ودان تۋىندايتىن قولايسىزدىقتارعا نارازى.
كۇن بۇدان دا قاتتى سۋىتسا نە بولار ەكەن؟ جىلىتۋ ماۋسىمىنا دايىنبىز دەگەنى قايدا؟! 27ء-شى شاعىن اۋدان بيىل ابدەن ازاپ شەكتى. جىلىتۋ ماۋسىمى باستالعالى ءبىر اپتا بولماي، جىلۋ بەرىلۋ توقتاپ قالدى. «اقتاۋدا كۇندە ءبىر نارسە سىنادى. سۋسىز وتىر ەدىك، ەندى جىلۋسىز قالدىق. وسى قالاعا كوشىپ كەلگەننەن بەرى تۇسىنگەنىم – بۇل قالانىڭ ساۋ، ءبۇتىن جەرى جوق سياقتى»، دەپ جازىپتى تاعى ءبىر تۇرعىن.
پرەزيدەنت ىلە-شالا اپات بولعان ۋچاسكەلەردەگى جاعدايدى شۇعىل رەتتەپ، حالىقتى جىلۋمەن جانە سۋمەن قامتۋدى تەز ارادا قالپىنا كەلتىرۋدى، بارلىق ەلدىمەكەندەگى كوممۋنالدىق جەلىلەردىڭ ۇزدىكسىز جۇمىسىن جولعا قويۋدى تالاپ ەتتى.
ال ەكس-ديپومات، ساياساتكەر قازبەك بەيسەبايەۆ مۇنىڭ ءبارىن سەلقوستىقتىڭ ناتيجەسى دەيدى.
– قازاقستان جازى ىستىق، قىسى سۋىق كليماتتىق ايماقتا ورنالاسقان. ەلدىڭ باسىم بولىگىندە قىز ايازدى كەلەدى. ەندەشە جىلۋمەن قامتۋ ماسەلەسى ءبىز ءۇشىن ءبىرىنشى ورىندا تۇرۋى كەرەك.
جىلۋ بەرۋ ماۋسىمى اياقتالا سالىسىمەن بارلىق جابدىقتار مەن جۇيەلەردى تەكسەرىپ، جوندەۋگە دەرەۋ كىرىسۋىمىز قاجەت ەدى. نەگىزى، ءوزىنىڭ جەكە ۇيىندە تۇراتىن اۋىل مەن قالا تۇرعىندارى وسىلاي ىستەيدى. ال بيلىكتىڭ بۇعان نەگە دۇرىس كوڭىل بولمەيتىنى ۇلكەن سۇراق. مۇنىڭ ايعاعى – بىلتىر قاتىپ قالعان ەكىباستۇز بەن قازىرگى اپاتتار.
– جىلۋ جۇيەسىندە اپات نەگە كوبەيدى؟
– جاۋابى انىق. توزعان، بۇكىل رەسپۋبليكا بويىنشا كۇردەلى جوندەۋدى قاجەت ەتەدى. جوندەۋ مەن پروفيلاكتيكالىق جوندەۋ جۇمىستارىن جۇرگىزبەگەن. الداۋ، سىرتىن اشەكەيلەۋ، قاتىردىق دەپ رەپورتاج تاراتۋ ءبىرىنشى ورىندا. بيلىك مەگاجوبالارعا قىرۋار قارجى ءبولىپ، سونىڭ قىزىعىن كورۋدى كوبىرەك ويلايدى.
رەسمي تۇردە 2،5 ملرد دوللار جۇمسالعان ەكسپو كورمەسىن مىسالعا كەلتىرۋگە بولادى. ءىس جۇزىندە كورمەنىڭ شىعىنى ودان دا كوپ بولدى. بۇل اقشاعا بۇكىل ەلدىڭ تۇرعىن ۇي-كوممۋنالدىق شارۋاشىلىعىن تولىعىمەن جاڭارتىپ، جىلۋمەن قامتۋ جاعىن رەتكە كەلتىرۋگە بولار ەدى. ءبىراق جۇرەگى مەن جۇيكەسى جالعىزدىقتان كۇيزەلگەن ءبىر اتانىڭ ۋاقىتى بولمادى، ول نوبەل سىيلىعىن كوكسەۋ مەن بيلىكتى ۇلدارىما قالاي قالدىرسام دەگەندى ويلاۋمەن وتىرىپتى. بۇكىل مەملەكەتتىك اپپارات ەلگە ەمەس، ءبىر كىسىگە جۇمىس ىستەگەنىن ايتا كەتەيىك. ونىڭ رۋحاني جالعىزدىعى بىزگە قىمباتقا ءتۇستى. ەندى ونىڭ ازابىنان ازاماتتارىمىز توڭىپ ءولۋى مۇمكىن.
پىكىر قالدىرۋ