2017 جىلى شىمكەنتتەگى ءىرى نىسان سانالاتىن مۇز ايدىنى 128 ملن تەڭگەگە ساتىلىپ كەتكەن. قالا اكىمدىگىنىڭ باسپا ءسوز قىزمەتى سول كەزدە مۇز سارايىن «مۇنايقۇرىلىسسەرۆيس» ءجشس-ى ساتىپ العانىن حابارلاعان. بۇل كومپانيا شىمكەنتتىك كاسىپكەر، وليگارح سەرىكجان سەيىتجانوۆقا تيەسىلى.

اۋكسيونداعى باستاپقى باعاسى  996 944 000 تەڭگە دەپ بەلگىلەنگەن مۇز ايدىنى بار-جوعى 128 ملن تەڭگەگە ءوتىپ كەتكەن. نىساننىڭ ساتىلۋىن جەرگىلىكتى شەنەۋنىكتەر قارجى تاپشىلىعىنىڭ سالدارىنان كۇتىپ-ۇستاپ تۇرۋ مۇمكىن ەمەس دەپ تۇسىندىرگەن.

ەڭ قىزىعى، جەكەمەنشىككە نەبارى 128 ملن تەڭگەگە ساتىلىپ كەتكەن بۇل مۇز ايدىنىن اكىمدىك ەندى 1 ملرد تەڭگەگە جالعا العان. بۇل سۇمدىق قوعامدا قىزۋ تالقىعا ءتۇسىپ، شىمكەنت قالاسىنىڭ جاڭا اكىمى عابيت ءابدىماجيت ۇلى جۋرناليستەرگە بەرگەن جاۋابىندا: «ءقازىر قۇقىق قورعاۋ ورگاندارى تەكسەرىپ جاتىر، قانشالىقتى زاڭدى، نە زاڭسىز ەكەنىن قورىتىندىسى شىققان سوڭ ايتامىز» دەيدى.

ياعني، اكىم بۇل جەردە ءوزىنىڭ قاتىسى جوعىن ايتىپ، بارلىق ماسەلە تەك قۇقىق قورعاۋ ورگاندارىنىڭ قۇزىرىندا دەگەن سىڭاي تانىتادى.

ەندەشە «ادىلدىك جولى» رەسپۋبليكالىق قوعامدىق كەڭەسىنىڭ ءتوراعاسى ديدار سماعۇلوۆ بۇل وقيعادا سىبايلاس جەمقورلىق بولۋى مۇمكىن ەكەنىن ايتادى.

اكىمدىك 2017 جىلى شىمكەنت مۇز سارايىن جەكەنىڭ قولىنا وتكىزگەن. بۇل ايماقتاعى ەڭ ۇلكەن سپورت كەشەنى، اۋماعى 6203 شارشى مەتر. وعان قوسا اكىمشىلىك عيماراتى 1810،8 ش.م. سول كەزدە بار بولعانى 128 ملن تەڭگەگە ساتىلعان. ەندى جەرگىلىكتى وليگارح سەيىتجانوۆ ونى ميلليارد تەڭگەگە جۋىق اقشاعا قايتادان اكىمدىككە جالعا بەرىپ وتىر. مۇز سارايىنىڭ 67 پايىز ۇلەسى وليگارح سەيىتجانوۆتىكى، 33 پايىزى «ساۋتجانوۆ» جشس-ىنە تيەسىلى. ءبىراق ول كومپانيا دا سەيىتجانوۆتىكى بولىپ شىقتى.

فوتو: ديدار سماعۇلوۆ

– كىشكەنتاي ءۇيدىڭ باعاسىنا ۇلكەن سپورت كەشەنى. اكىمدىك 3 جىلدا 40 ملن تەڭگە كىرىس اكەلگەن نىساندى ۇستاۋعا اقشا جوقتىعىن ايتىپ شاعىمدانادى ەكەن، ءبىراق وليگارحتان مۇز سارايىن جالعا الۋعا اقشا تاپتى. 2017-2023 جىلدار ارالىعىندا مەملەكەت سپورت كەشەنىن جالعا الۋ ءۇشىن 1 ملرد تەڭگەدەن استام قارجى تولەگەن. ساتىپ الۋ پورتالىندا 1 031 795 386 تەڭگەنى قۇرايتىن شارتتاردى تاپتىق.

ياعني، 128 ميلليونعا ساتىپ الىڭىز دا، سودان كەيىن 7 جىل مەملەكەتكە جالعا بەرىڭىز. سەيىتجانوۆ 360 ملن دوللار بايلىعىمەن Forbes رەيتينگىندە 23ء-شى ورىندا تۇرعان شىمكەنتتەگى بەدەلدى كاسىپكەر. نەمەرەسىنە قايرات ساتىبالدىنىڭ قىزىن اپەرگەن تويدا 21 ملن تەڭگەنىڭ تورتىن جەيتىندەي ءجونى بار ەكەن. ەندى بۇل وليگارحتىڭ تاۋبەسىنە ءتۇسىپ، عيماراتتى كۇردەلى جوندەۋدەن وتكىزىپ مەملەكەتكە قايتارىپ بەرگەنى دۇرىس بولار ەدى، دەيدى دانيار سماعۇلوۆ.

ايتپاقشى، تورت تۋرالى اڭگىمەنى جۋرناليست ۇلىقبەك ۇمبەت تە راستاپ وتىر: 

«شىمكەنتتەگى مۇز سارايى قالايشا 7 تورتتىڭ قۇنىنا ساتىلىپ كەتتى؟ 7 تورت دەپ وتىرعان سەبەبىم، رەنات اگزاموۆ ەسىمدى  كونديتەردىڭ جازۋىنا قاراعاندا، سەيىتجانوۆتار اۋلەتى نەمەرەلەرىنىڭ تويىنا 3750000 رۋبلگە قازىرگى نارىقپەن 18675000 تەڭگەگە تورتقا تاپسىرىس بەرىپتى. مۇز سارايى 128 ملن تەڭگەگە ساتىلعان. 128000000:18675000= 6،8. مۇنى ەسەپتەۋ ءۇشىن عۇلاما بولۋدىڭ قاجەتى جوق، تەك ماتەماتيكانىڭ ءتورت امالىن بىلسەڭ بولدى. راسىمەن دە «جاڭا قازاقستان» قۇرۋدى قولعا الاتىن بولساق، وسى ءىس بويىنشا سول كەزدەگى شىمكەنت قالاسى مەن وڭتۇستىك قازاقستان وبلىسىنىڭ اكىمدىكتەرىنەن جاۋاپ الىنۋى كەرەك»، دەيدى ول.

2023 جىلدىڭ 5 قىركۇيەگىندە تاعايىندالعان عابيت سىزدىكبەكوۆكە دەيىن شىمكەنتتە كىمدەر اكىم بولعانىن ەسكە سالايىق:

2015-2017 جىلدارى جانە 2018-2019 جىلدارى – عابيدۋللا ءابدىراحمانوۆ.

2019 جىلى – ەرلان ايتاحانوۆ.

2020-2023 – مۇرات ايتەنوۆ.