الماتىداعى باۋم توعايىندا اعاشتار جاپپاي وتالىپ جاتىر. بىرەۋ ساپ-ساۋ تۇرعان اعاشتاردى الىپ تاستاپ، ونىڭ ورنىنا قۇرىلىس الاڭىن دايىنداپ جاتقان سياقتى، دەيدى بەلسەندى سانجار بوقايەۆ.

ورمان شارۋاشىلىعى كوميتەتى سانيتارلىق ماقساتتا باۋم ساياباعىندا 1000 اعاشتى وتاۋعا رۇقسات بەرگەن ەكەن. ال جەرگىلىكتى ەكوبەلسەندىلەردىڭ ەسەبىنشە، بيىل بۇل پاركتە 2074 اعاش تامىرىمەن جۇلىنىپ، تۇبىنەن كەسىلگەن، ونىڭ جارتىسىنا جۋىعى ساۋ اعاش بولعان.

توعايداعى جاعدايدى ايتىپ، تۇرعىندار ەكوبەلسەندى گۇلميرا تاشيموۆانى شاقىرعان.

— جيھاز ءۇشىن كەسىلگەن بە دەگەن وي كەلدى. كەسىلگەن دىڭدەردىڭ ۇزىندىعى 7-8 م، دىڭدەرى ءتۇزۋ. كەپتەلىپ قالعان كامازدى شىعارۋ ءۇشىن ادەمى اعاشتى شىنجىرمەن زاقىمداپ تاستاعان. ال كەسىلگەن اعاشتاردىڭ دىڭىنەن بەلگى تاپپادىق، تەك بىرەۋىنە عانا قويىلعان. سەيسەنبىدە ولار بارلىق بوشكەلەردى اۋدارىپ، اعاشتى شابۋ تۋرالى بەلگىلەردى كورسەتۋگە ۋادە بەرەدى. ءبىراق ءبىزدىڭ تەكسەرىمىزدىڭ ناتيجەسىندە ەش ءبىر اعاشتا ەشقانداي بەلگى جوق ەكەنىن انىقتادىق. مەدەۋ» ساياباعىنىڭ قىزمەتكەرلەرى مەملەكەتتىك ورگاندار مەن تۇرعىنداردى الداپ وتىر. مىڭنان ارتىق اعاش كەسىلدى. ەكو-پاترۋل ەرىكتىلەرى اعاش ءدىڭىن ساناپ، ناقتى سانىن شىعاردى،  — دەيدى ول. 

سانجار بوقايەۆتىڭ ايتۋىنشا، الماتى اكىمدىگى سانيتارلىق كەسۋ مەن جەردە قالعان اعاش قالدىعىن شىعارۋعا 27 ملن تەڭگە بولگەن. تەندەردى “Solarit” ءجشس-ى جەڭىپ العان. ءبىراق جۇمىستى ۇقىپسىز اتقاراتىنى جاعا ۇستاتادى. ماسەلەن، اۋرۋ اعاشتى كەسۋ ءۇشىن ورمانعا اۋىر تەحنيكامەن كىرىپ، جاس تالداردى تاپتاپ، ۇلكەن ساۋ اعاشتاردى اياماي زاقىمداي بەرگەن. تيتتەي جاناشىرلىعى بولسا، بۇل جەرگە تەحنيكا كىرمەۋى ءتيىس ەدى.

بوقايەۆ مىناداي تاريحي فاكتىنى كەلتىرەدى:

2001 جىلى پرەمەر-مينيستر قاسىم-جومارت توقايەۆ بوپ تۇرعاندا ارنايى قاۋلىمەن الماتىنىڭ باۋم توعايىندا مەملەكەتتىك تابيعات ەسكەرتكىشى جانە ەرەكشە قورعالاتىن تابيعي اۋماق مارتەبەسى بەرىلگەن.

2018 جىلى پرەمەر-مينيستر باقىتجان ساعىنتايەۆتىڭ قاۋلىسىمەن ساياباق ەرەكشە قورعالاتىن تابيعي اۋماق مارتەبەسىنەن ايىرىلدى. ويتكەنى ونىڭ الدىندا، 2017 جىلى سول كەزدەگى اكىم باۋىرجان بايبەك نۇرسۇلتان نازاربايەۆتان “ەرەكشە قورعالاتىن تابيعي اۋماقتار تۋرالى” زاڭدى وزگەرتىپ، بۇل ورماندى رەسپۋبليكالىق ماڭىزى بار مارتەبەدەن ايىرىپ، قالا اكىمدىگىنىڭ كوممۋنالدىق مەنشىگىنە بەرۋدى سۇراعان بولاتىن. 

– كورىپ وتىرعانىمىزداي، بۇل باۋىرجان بايبەك پەن نۇرسۇلتان نازاربايەۆتىڭ بولاشاقتا وسى باقتىڭ ورنىن كەزەكتى تۇرعىن ءۇي كەشەنىن سالۋ ءۇشىن بوساتىپ بەرمەك جوسپارى بولعانىن بىلدىرەدى. مۇنى باسقاشا ءتۇسىندىرۋ مۇمكىن ەمەس. باۋم ساياباعى جىلدار بويى قاراۋسىز قالىپ، ونى قاساقانا قۇرتىلىپ كەلگەنىنىڭ سىرى بەلگىلى بولدى، – دەيدى سانجار بوقايەۆ.