قازاقستانداعى بايلانىس وپەراتورلارى ءقازىردىڭ وزىندە تۇتىنۋشىلارىنا تاريف قۇنى وسەتىنىن ەسكەرتىپ جاتىر.

سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين بۇل جايىندا: «وپەراتورلار تاريفتىك ساياساتىن دەربەس جۇرگىزەدى جانە حالىقارالىق ترافيكتى وپەراتورلاردىڭ ءوزى تولەيدى. ياعني، وپەراتور وزىنە اقشا المايدى، ول ءسىزدىڭ اقشاڭىزدى الىپ، حالىقارالىق ترافيكتى سول جەردەن تولەيدى. سونىڭ ىشىندە وسى ترافيككە قىزمەت كورسەتەتىن جابدىققا جانە ت.ب. قىزمەتتەر بار»، – دەپ مالىمدەدى.

قوعام بەلسەندىسى، ساياساتكەر سانجار بوقايەۆ بايلانىس وپەراتورلارى تاريف ساياساتىن وزدەرى بەلگىلەيدى دەگەن ءمينيستردىڭ سوزىمەن كەلىسپەيدى. «سوندا تاريف باعاسىن 5 ەسە كوبەيتە الا ما؟ بۇل قيسىنسىز. انتيمونوپوليالىق كوميتەت قايدا؟» دەپ سۇراۋ سالدى ول.

– مينيستر بايلانىس وپەراتورلارىن جيناپ، 3 ماسەلەنى قوزعاۋى كەرەك ەدى. بىرىنشىدەن، دۇنيەجۇزىندە سوڭعى بەس جىلدا ينتەرنەت باعاسى وسكەن جوق، قايتا ارزانداي ءتۇستى. ءقازىر 1 گب – 2،61 دوللار تۇرادى. بۇل 2019 جىلمەن سالىستىرعاندا 4 ەسە ارزان. بۇعان تەڭگە تۇراقتاپ، دوللار باعامى ءبىرشاما تومەندەگەنىن قوسايىق. كەلەسى كەزەكتە، ءموبيلدى ينتەرنەت پەن تاريفتەردى قىمباتتاتۋدىڭ نەگىزسىز ەكەنىن ايتۋ قاجەت. «كسەلل» اق-نىڭ ەسەبىندە 2022 جىلى كەلىسىمشارتتاردان 219،002 ملن دوللار تۇسكەنى، جىلدىق پايداسى 84،963 ملن دوللار بولعانى كورسەتىلگەن. دەمەك، باعا كەرىسىنشە، ارزانداۋى ءتيىس، – دەيدى.

ءموبيلدى ينتەرنەتتىڭ جىلدامدىعى جاعىنان قازاقستان الەمدە 67ء-شى ورىندا. مينيستر “باسىپ وزعانبىز” دەپ ماقتانعان جاپونيانىڭ ينتەرنەتى بىزدەن كوش ىلگەرى.

باعدات ءمۋسيننىڭ ينتەرنەت ماسەلەسىنە كەلگەندە وزىنە شاڭ جۋىتپاي، ارتىق سويلەپ قوياتىنى بار. كەشە «ينتەرنەتتى ۇنەمدەڭدەر» دەپ اقىل ايتتى. مادەنيەتتى حالىق ايىنا 15-20 گب ەمەس، ودان از ينتەرنەت تۇتىنۋى كەرەك-مىس.

مينيستر «ۋادە» باعدارلاماسىنا بەرگەن سۇحباتىندا بىلاي كوسىلگەن:

– مەنىڭ ويىمشا، عالامتوردى ءبىر ساعاتتان ارتىق قولدانباۋ كەرەك. مىسالى، ادام 12 ساعاتتىڭ 8 ساعاتىن جۇمىستا وتكىزسە، قالعان 4 ساعاتتىڭ ءبىر بولىگىندە عانا ينتەرنەت قولدانسىن. ءتىپتى جۇمىستا دا عالامتوردى پايدالانۋ ۇلكەن پايدا بەرمەيدى، دەپتى.

ءاي، دەيمىز. سوندا پرەزيدەنت توقايەۆ تاپسىرعان سيفرلاندىرۋ قايدا؟ ءقازىر ينتەرنەتسىز ءومىر جوق ەكەنىن بىلمەيتىن ءمۋسيننىڭ ءوزى قاي عاسىردا ءجۇر؟