2023 جىلدىڭ سوڭىندا جاس تالاپكەر جانەركە ماراتتىڭ «Ziyaly» باسپاسىنان «مەن الەمدى سۇيەمىن» اتتى ءتۇرلى-تۇستى كىتابى جارىق كوردى. 19 جاستاعى قالامگەردىڭ بۇل تىرناقالدى تۋىندىسى. ونىڭ العاشقى ماقالالارى مەكتەپ قابىرعاسىندا، ءۇشىنشى سىنىپتا وقىپ جۇرگەن كەزىندە-اق «ۇلان»، «قازاقستان پاتريوتى» باسىلىمدارىندا جارىق كورە باستاعان.
جانەركە مارات 2004 جىلى الماتى قالاسىندا جۋرناليستەر وتباسىندا دۇنيەگە كەلگەن. 2022 جىلى ش.ءۋاليحانوۆ اتىنداعى مامانداندىرىلعان مەكتەپ-گيمنازيانى «التىن بەلگىگە» ءبىتىردى. پاندەر بويىنشا ۇزدىك جەتىستىكتەرى ءۇشىن «ەل بىرلىگى» (بۇرىنعى «ەلباسى») مەدالىمەن ماراپاتتالعان. شەتەلدە وقۋ ءۇشىن ءبىر جىل بويى اعىلشىن تىلىمەن اينالىستى. قوعامدىق جۇمىستارعا اتسالىستى. حالىقارالىق يۋنەسكو ۇيىمىنىڭ جانە «بايتاق» جاسىلدار پارتياسىنىڭ مۇشەسى. وتكەن جىلى ورتالىق مۋزەيدە ءوزىنىڭ جەكە سۋرەت كورمەسىن وتكىزسە، بيىل مىنە، ارمانىنا قول جەتكىزىپ جەكە كىتابى باسپادان شىعىپ وتىر.
اتا-اناسىمەن بىرگە كوپتەگەن مەملەكەتتەردى ارالاعان، تاريحي ورىنداردى كوزىمەن كورگەن جەتكىنشەك ءوز اسەرىن قۇربى-قۇرداستارىمەن بولىسكىسى كەلەتىن. ولاردىڭ قاتارىندا ءوزى قالام تەربەگەن ەجەلگى ترويا، توپقاپى سارايى، قۇم ىشىندەگى دۋباي، الەپپو، اگرا، كۋسكو، كارناك، كارفاگەن، ستوۋنحەدج، سيدون، ماراككەش سياقتى كونە قالالار بار. ارمان اقىرى ناقتى ناتيجەگە اينالدى. كىتاپقا زەرەدەلى جاستىڭ مەكتەپ قابىرعاسىندا جۇرگەندە ۇستازدارىنىڭ جەتەكشىلىگىمەن جۇرگىزگەن جۇيەلى زەرتتەۋلەرى، عىلىمي-كوپشىلىك ماتەريالدارى دا ەنگىزىلگەن.
جيناق «ساياحاتقا بارعاندا»، «ەجەلگى قالالار تاريحى»، «تاريح – عىلىم مەن ونەردى جالعاستىرۋشى كوپىر»، بالا شاقتان – بولاشاققا»، «عىلىمي-كوپشىلىك جۇمىستار» سياقتى بەس تاراۋدان تۇرادى. كىتاپ ق ر ۇلتتىق كىتاپحاناسىنىڭ قورىنا الىندى.
جيناقپەن مىنا سىلتەمە بويىنشا تانىسۋعا بولادى:
پىكىر قالدىرۋ