بيىلعى جىل – بيلىك تاراپىنان حالىقتىڭ بەلگىلى ءبىر تىنىشتىعىن بۇزۋدان باستالدى. "سەن تيمەسەڭ مەن تيمەن" بوپ وتىرعان شىرقىمىزدى بيلىكتىڭ ءوزى بۇزدى. قازاقستانداعى زاڭ مەن ءتارتىپ باسقاعا ەمەس، تابىس دەكلاراسياسى مەن ءموبيلدى اۋدارىمداردى باقىلاۋعا قاراپ تۇرعانداي.

2024 جىلدان باستاپ كەي كاسىپكەرلەر، دۇكەندەر، بازار مەن ساۋدا ورىندارى باس سالىپ تەك قولما قول قاعاز اقشاعا عانا قابىلداۋعا كوشتى. بۇل باسى عانا بولۋى مۇمكىن. بىلايشا ايتقاندا، ەل كەرى كەتىپ بارادى. «جاڭا قازاقستان» مەن «سيفرلى قازاقستان» جايىنا قالدى.

ۇكىمەت شاعىن كاسىپكەرلەردەن بولەك، جەكە تۇلعالاردىڭ اۋدارىمدارىن دا تەكسەرمەك.

"ق ر سالىق كودەكسىنە ساي، Kaspi.kz سالىق ورگانىنىڭ سۇراتۋى بويىنشا قاتارىنان 3 ايدىڭ ىشىندە ءارتۇرلى ادامداردان ايىنا 100-دەن استام اۋدارىم الاتىن جەكە تۇلعالاردىڭ ءتىزىمىن بەرۋگە مىندەتتى. سونداي-اق 2024 جىلى تىزىمگە 2023 جىلى اقشا اۋدارىمدارىن قابىلداعان مەملەكەتتىك مەكەمەلەردىڭ، كۆازيمەملەكەتتىك سەكتوردىڭ جۇمىسكەرلەرى مەن ولاردىڭ جۇبايلارىن قوسادى. تەكسەرۋ 2024 جىلى جۇرگىزىلىپ، 2026 جىلى بۇل بارلىق جەكە تۇلعالارعا قاتىستى بولادى"، – دەلىنگەن Kaspi.kz حابارلاماسىندا.

شاعىن كاسىپكەرلەردى سالىقپەن قىسۋ بىرىنشىدەن قىمباتشىلىققا، ەكىنشىدەن، حالىقتىڭ بۇرىنعىداي كاسپي اۋدارىممەن ەمىن-ەركىن تولەم جاساۋىنا كەدەرگى كەلتىرەدى. بۇعان قاتىستى قارجى ساراپشىسى ءسابيت رىسبايەۆ مىناداي پىكىر بىلدىرەدى:

– كاسپي پەريەۆودتى توقتاتايىق دەمەس بۇرىن ءبرىنشى سالىق تولەۋدى رەتتەۋ كەرەك. بۇرىن جشس-تەر 30 مىڭ اەك-تەن اسسا، ققس تولەيتىن. ەندى 20 مىڭ اەك-تەن اسقاندار تولەيتىن بولدى.

ەندى اقىلدىلار دۇكەنگە اۋدارىم جاساماي، QR-مەن تولەسە نە بولادى؟ ءبىرىنشى كەزەكتە قۋاناتىن بانكتەر. ولار ودان 0.95% الادى. ونى بانكتەن شىعاراتىن بولسا، تاعى دا 0.95% قوسىلادى. راحاتىن بانكتەر كورەدى. بىزدەگى كاسپي مەن حالىقتىڭ تابىسىن قاراساڭ، 300 ملرد تەڭگەدەن استام. بۇلاردا پايىز جوعارى، مىنا جاقتان دا تيىن جاسايدى. شەتەلدەگىدەي كرەديت كارتاسى دەگەن جوق. ءسىز ءىرى برەند دۇكەنگە بارعاندا ولار "پەريەۆود جاساشى" دەمەيدى. ويتكەنى ولاردىڭ شارتتارى بولەك، 1-2%-عا قاراپ تۇرعان جوق. ونى ايتاتىن قاراپايىم دۇكەن يەسى، تاكسيستەر عوي. تاكسيستەر وزىنە دە اۋدارتا المايدى، 70-80% شوتتارى ارەستتە. كرەديت تولەي الماي، جاۋىپ تاستاعان. ايەلىنە، بولماسا شەشەلەرىنە اۋدارتىپ جاتادى. ەرىگىپ جۇرگەن ولار دا جوق.

ءدال وسى قالت-قۇلت ەتىپ وتىرعانداردى قىسپاي-اق، باسقاسىن قارىق قىلىپ الايىقشى. حالىققا الدىمەن جاعداي جاسا! كولىكتى ارزاندات. ۋتيلسبوردى قۇرت. نەگە دامىعان ەلدەردە ۋتيل الىمدارى 100 دوللار، بىزدە 3000 دوللارعا دەيىن كەتىپ قالادى؟ مەنىڭشە، اينالىپ كەلىپ حالىقتى قىسا بەرمەۋ كەرەك. ونسىز دا ءبيتىن سىعىپ، قانىن ءىشىپ وتىر كوبى. "اقىلدىلار"، الدىمەن بيۋدجەتتىك تۇسىمدەردى قاراپ الىڭدارشى، – دەيدى ەكونوميست.