ق ر قورعانىس مينيسترلىگى قورعانىس ۆەدومستۆوسى باسشىسىنىڭ «2024 جىلى اسكەري مىندەتتىلەردى اسكەري جيىندارعا شاقىرۋ تۋرالى» بۇيرىعىنىڭ جوباسىن ازىرلەدى.
مينيسترلىكتىڭ حابارلاماسىندا جيىن كەزىندە اسكەري مىندەتتىلەردىڭ جۇمىس ورنى مەن اتقاراتىن لاۋازىمى ساقتالاتىنى ايتىلعان. ولارعا ورتاشا جالاقى، ال جۇمىسسىزدارعا مەملەكەت ەسەبىنەن ەڭ تومەنگى جالاقى تولەنەدى. اسكەري مىندەتتىلەردى تەمىرجول نەمەسە اۆتوموبيل كولىگىمەن تاسىمالداۋ، ولاردى تاماقپەن قامتاماسىز ەتۋ ق ر قورعانىس مينيسترلىگىنىڭ قاراجاتى ەسەبىنەن جاسالادى.
جيىنعا شاقىرىلعان بارلىق اسكەري مىندەتتىلەر كازارمالىق جاعدايدا بولادى. ولاردى ءبولىمنىڭ ورنالاسقان جەرىنەن سەيىلگە شىعۋىن روتا كومانديرلەرى ىشكى قىزمەت جارعىسىندا بەلگىلەنگەن تارتىپپەن جۇرگىزەدى.
اسكەري ءتارتىپ پەن قوعامدىق ءتارتىپتى بۇزعانى، قىلمىس جاساعانى، سونداي-اق مەملەكەتكە كەلتىرگەن ماتەريالدىق زالالى ءۇشىن اسكەري جيىندارعا شاقىرىلعان اسكەري مىندەتتىلەر ەلدىڭ زاڭناماسىنا سايكەس جاۋاپقا تارتىلادى. اسكەري مىندەتتىلەردىڭ اسكەري جيىنداردان جالتارۋى اكىمشىلىك قۇقىق بۇزۋشىلىق تۋرالى كودەكسكە سايكەس بەس ايلىق ەسەپتىك كورسەتكىش مولشەرىندەگى ايىپپۇل سالۋعا اكەپ سوعاتىنى دا ەسكەرتىلگەن.
پىكىر قالدىرۋ