دىنمۇحامەد (ديماش) احمەت ۇلى قونايەۆ – مەملەكەت جانە قوعام قايراتكەرى، ءۇش مارتە سوسياليستىك ەڭبەك ەرى، قازاق كسر عىلىم اكادەمياسىنىڭ اكادەميگى، تەحنيكا عىلىمدارىنىڭ دوكتورى.

بىرنەشە مارتە كسرو جوعارى كەڭەسىنىڭ دەپۋتاتى بولىپ سايلاندى. كوكپ-نىڭ XIX-سەزىنەن باستاپ، كەيىنگى سەزدەرىنىڭ بارىنە دەلەگات بولدى. پارلامەنت جانە پارتيا دەلەگاسياسىن باسقارىپ، الدەنەشە رەت شەتەلدەردە بولىپ قايتتى.

دىنمۇحامەد احمەت ۇلى ەل باسقارعان جىلدارى كەڭ بايتاق قازاق جەرىندە 68 جۇمىسشىلار كەنتىمەن 43 قالا پايدا بولدى. كەڭشارلار مەن ۇجىمشارلار سالىندى. مال سانى كوبەيىپ، اۋىل شارۋاشىلىعىنىڭ ونىمدەرى جىل سايىن ارتىپ وتىردى.

دىنمۇحامەد احمەت ۇلى ارقاسىندا قازاقستاننىڭ ونەركاسىپ، ونىڭ ىشىندە ءتۇرلى-تۇستى مەتاللۋرگيا سالاسى جوعارى دەڭگەيدە دامىدى.

قازاقستان رەسپۋبليكاسىنىڭ ۇلتتىق عىلىم اكادەمياسىنىڭ اكادەميگى دىنمۇحامەد احمەت ۇلى قونايەۆ عىلىم سالاسىندا وراسان زور قىزمەت ەتتى. 100-دەن اسا عىلىمي ەڭبەكتەرمەن زەرتتەۋلەر جازدى. ءبىراز عىلىمي جۇمىستارىن شارۋاشىلىق پەن وندىرىستىك تاجىريبەدەن وتكىزدى. ءوز ەڭبەكتەرىنىڭ حالىق شارۋاشىلىعىنا تيگىزەر پايداسىنىڭ زور ەكەندىگىن ءىس جۇزىندە دالەلدەگەن ەدى. ءوندىرىس تيىمدىلىگىن ارتتىرۋمەن قاتار، ول جاس عالىمداردى قولداپ، ءبىلىم جۇيەسىنە ەرەكشە كوڭىل ءبولدى.

قازاق ونەرىن جوعارى باعالاعان دىنمۇحامەد احمەت ۇلى ونەردە جۇرگەن جانداردى جان-جاقتى قولداپ، قازاق مادەنيەتىنىڭ دامۋىنا ىقپال ەتتى. ونەر وردالارى سالىنىپ، مادەنيەت ۇيلەرى ءوز قىزمەتىن باستادى. قازاق جەرىنىڭ بارلىق ايماقتارىندا دەرلىك ءبىلىم جانە مادەني وشاقتار اشىلىپ، تۇرعىن ۇيلەر تۇرعىزىلىپ، الەۋمەتتىك نىساندار سالىندى.

دىنمۇحامەد احمەت ۇلى قونايەۆتىڭ باستاماسى بويىنشا قازاق جەرىنىڭ سول كەزدەگى استاناسى الماتى قالاسىندا ۇكىمەت ءۇيى، قازاقستان كومپارتياسىنىڭ ورتالىق كوميتەتىنىڭ عيماراتى، قازاقستان رەسپۋبليكاسىنىڭ ۇلتتىق عىلىم اكادەمياسىنىڭ عيماراتى تۇرعىزىلدى. قالا كوشەلەرىنىڭ سانى ارتىپ، جاڭا تۇرعىن ۇيلەر سالىنىپ، 12 ىقشام اۋدان اشىلدى. مەكتەپ پەن بالا-باقشا عيماراتتارىنىڭ قۇرىلىسى باستالىپ، وقۋشىلار سارايى جاس ونەرپازدارعا ەسىگىن ايقارا اشتى. رەسپۋبليكا سارايى، سپورت جانە مادەنيەت سارايى، «مەدەۋ» سپورت كەشەنى، ۇلتتىق كىتاپحانا، سيرك سىندى مادەنيەت، ءبىلىم جانە سپورت نىساندارى بوي كوتەردى. اۆتو، اەرو جانە تەمىر جول ۆوكزالدارى، اۋەجاي، «الماتى»، «وتىرار»، «جەتىسۋ»، «الاتاۋ»، «دوستىق»، «قازاقستان» قوناقۇيلەرى سالىنىپ، قالا كوركىن اشتى.

دىنمۇحامەد احمەت ۇلى قونايەۆ رەسپۋبليكا پارتيا ۇيىمىن باسقارعان شيرەك عاسىرعا جۋىق ىشىندە ءوزىنىڭ ۇلكەن مادەنيەتتىلىگىمەن، ءيمانجۇزدى ىزەتتىلىگىمەن، تانىلىپ، حالىق ءداستۇرىن جاقسى بىلەتىن، تاعىلىمى تەرەڭ، وي-ورەسى بيىك جان ەكەنىن كورسەتتى. كەيىن مەملەكەت ىسىنەن قول ۇزگەن كەزدە دە ول ءبىلىمدار بىلىكتى جان رەتىندە ەلدە ءجۇرىپ جاتقان رەفورما باعىتتارىن، قوعامدى دەموكراتيالاندىرۋ قاجەت ەكەنىن تەرەڭ ءتۇسىنىپ، قولداي ءبىلدى.

قوعام قايراتكەرىنىڭ ەڭبەگىن ەسكەرىپ، الماتى وبلىسىنىڭ قازىرگى ورتالىعى دىنمۇحامەد قونايەۆتىڭ ەسىمىن بەرۋ تۋرالى شەشىم قابىلدانعان.