ول  جازعان حاتىندا:

«ەرمۇرات باپي اعا مەن رينات زايىتوۆ باۋىرىما.

ۇشەۋىمىز دە – ساتقىنبىز. مەن – بيلىك ءۇشىن. ال سىزدەر حالىق الدىندا ساتقىنسىزدار. ەگەر بابالارىمىز قابانباي مەن قازىمبەت ءتىرىلىپ كەلسە، قايسىمىزدى قامشىنىڭ استىنا الار ەكەن» دەيدى ول.

الەۋمەتتىك جەلىلەردە تاراعان حاتتىڭ جازىلعانىن دۋمان مۇحامەدكارىمنىڭ اكەسى الماس تىلەپوۆ راستاعان ەكەن.

حاتتىڭ جازىلعانىنان ماجىلىسمەندەر دە حاباردار. ءارى حاتتىڭ ءبىرىنشى وزدەرىنىڭ قولدارىنا تيگەندەرىن دە ايتادى.

– باسىندا دۋمانمەن ول قامالماي تۇرعانىندا اڭگىمەلەسكەن كەزدە كوپ نارسەنى تالقىلاعان ەدىك. مەن وعان ءوز ويىمدى جەتكىزە المادىم. كەيدە ادامعا باسقا وي سالۋ ءۇشىن سولاي تىكەسىنەن قاتتى-قاتتى نارسەلەردى ايتادى. بۇرىن دا ءوزى يۋتۋب-كانالىن جۇرگىزىپ جۇرگەن كەزدە «مىنا جەردە نەگە وسىلاي ايتتىڭ؟» دەگەن كەزىمدە «انالاردىڭ ادەيى اشۋىنا تيۋ ءۇشىن ايتتىم» دەيتىن. سونداي ستيلدە ءوزى. بۇرىننان جۋرناليستيكادان بۇرىن ساتيراعا جاقىن، سونداي جىگىت قوي، – دەپ جاۋاپ بەردى رينات زايىتوۆ.

 ال ەرمۇرات باپي دۋماننىڭ حاتىمەن ەش كەلىسە المايمىن دەگەن.

– ونىڭ نە ويلاپ وتىرعانىن، قانداي ماقساتتا ايتقانىن بىلمەيمىن. مەن ول پىكىرگە ەشقاشان كەلىسپەيمىن. رينات ەكەۋمىز كوتەرىپ جۇرگەن ماسەلەمىز پارلامەنتتەگى زاڭنامالاردى دايىنداۋ ماسەلەسىنە دە، دەپۋتاتتىق ساۋالدا دا، حالىقتىق، ەلدىك، مەملەكەتتىك مۇددە دەڭگەيىندەگى تاقىرىپتار. سوندىقتان دۋماننىڭ دولبارى باسقاشا شىعار. مەن ول پىكىرمەن كەلىسە المايمىن، – دەيدى ول.

 ماسەلەنىڭ تاريحىنا ورالساق، ەرمۇرات باپي مەن رينات زايىتوۆ قاتىسقان ءماجىلىس سايىلاۋىنا جۋرناليست دۋمان مۇحامەدكارىم دە كانديداتۋراسىن ۇسىنعان. الايدا ونى كانديدات رەتىندە تىركەمەگەن. 19 ناۋرىزدا وتكەن ءماجىلىس سايلاۋىنىڭ ناتيجەسىنە قارسىلىق ءبىلدىرىپ، حالىقتى جاپپاي كوتەرىلىسكە شاقىرعانى ءۇشىن 25 تاۋلىككە قامالعان بولاتىن. كەيىن ونى قاماۋ مەرزىمى ۇزارتىلىپ، ۇستىنەن قىلمىستىق ءىس قوزعالدى.

سودان بەرى جۋرناليست تۇرمەدە ءالى وتىر. ءتىپتى بىرنەشە رەت اشتىق جاريالادى. قازاقستاندىق قۇقىق قورعاۋشىلار دۋمان مۇحامەدكارىمدى «ساياسي تۇتقىندار» تىزىمىنە ەنگىزگەن.