قاراعاندى وبلىسىنداعى اقتوعاي اۋدانى اكىمدىگىنىڭ ەكونوميكا جانە قارجى ءبولىمى «اقجارىق-اپپاز» تاس جولىن جوندەۋگە اشىق كونكۋرس جاريالاپتى. وعان بولمەك بولعان سوماسى 328 ملن تەڭگەدەن اسادى، دەپ حابارلايدى Qamshy.kz.

ءبىراق ونداي جول جوق ەكەن. بۇل – ءالى سالىنباعان تاس جول. سالىنباي جاتىپ ءبۇلىنىپ، ونى جوندەۋگە اسىعىپ اقشا بولۋگە كىرىسىپ كەتكەن ەكەن شەنەۋنىكتەر.

جوندەۋ جۇمىستارى قولدانىستاعى تاس جولدا جۇرگىزىلۋى كەرەك.

«قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتى تۋرالى» زاڭنىڭ 60-بابىنىڭ 1-تارماعىنا سايكەس وبەكتىلەر مەن ولاردىڭ كەشەندەرىنىڭ قۇرىلىسى جوبالىق (جوبالىق-سمەتالىق) قۇجاتتاما بويىنشا جۇزەگە اسىرىلادى.

وسى نورمانى بۇزا وتىرىپ، ەكونوميكا ءبولىمى قۇرىلىس جوباسى جوق جاڭا تاس جول سالۋعا ارەكەتتەنگەن.

قۇرىلىس-مونتاج جۇمىستارى بويىنشا مەملەكەتتىك ساتىپ الۋلار ق ر قارجى ءمينيسترىنىڭ 2022 جىلعى 18 قاڭتارداعى №46 بۇيرىعىمەن بەكىتىلگەن «رەيتينگتىك-باللدىق جۇيەنى پايدالانا وتىرىپ، كونكۋرس ارقىلى جۇزەگە اسىرىلاتىن تاۋارلاردىڭ، جۇمىستاردىڭ، قىزمەتتەردىڭ» تىزبەسىنە ەنگىزىلگەن.

وسىعان قاراماستان، قۇرىلىس-مونتاج جۇمىستارى تۋرالى حابارلاندىرۋ اشىق كونكۋرس ارقىلى ورنالاستىرىلعان.

"اقتوعاي اۋدانى پروكۋراتۋراسىنىڭ قاداعالاۋ اكتىسى بويىنشا بۇل كونكۋرس جويىلدى"، دەپ حابارلادى قاراعاندى وبلىسىنىڭ پروكۋراتۋراسى.