بىلەسىزدەر، بارىنەن اقشا جاسايتىن ساۋداگەرلەردىڭ كانىگى پسيحولوگ ەكەنىن. قازاقتىڭ داڭعوي، اتاققۇمارلىعىن دا ءبىلىپ العان ولار سوڭعى كەزدەرى ءتۇرلى-تۇرلى ماراپات ۇسىنىپ، ساۋداسىنىڭ كورىگىن قىزدىرىپ ءجۇر.  

باستاپقىدا بازاردا توي-تومالاقتا سۇيگەن قوناقتارىنا ويىنا كەلگەن اتاقتى جازىپ، ۇسىناتىن ءتۇرلى ماراپاتتاۋ قاعازدارى پايدا بولعان ەدى. ودان كەيىن كەزەك ديپلومدارعا كەلدى. ال ءقازىر مەملەكەتتىك ناگرادالاردىڭ اتاۋىن، كەسكىنىن اينا-قاتەسىز كوشىرىپ جاسايتىندار دا تابىلىپ جاتىر. ءبىراق بۇلاردىڭ سۇرايتىن اقىسى جالعان ماراپات قاعازداردان، ارينە الدەنەشە ەسە كوپ.

ماسەلەن، قۇرمەتتى قوناعىنىڭ بەدەلىن قالىڭ قاۋىم الدىندا ءبىر كوتەرىپ تاستاۋ ءۇشىن كەز كەلگەن ادام «قازاقستاننىڭ ەڭبەك سىڭىرگەن قىزمەتكەرى» اتاعىن 50 مىڭ تەڭگەگە ساتىپ الا الادى. ال «قازاقستاننىڭ قۇرمەتتى ازاماتى» توسبەلگىسىنىڭ قۇنى - 100 مىڭ تەڭگە.

كۇنى كەشە اتالعان ماسەلەنى ءماجىلىس قابىرعاسىندا كوتەرگەن دەپۋتات امانجول التايەۆ تويدا اقىلى اتاق پەن مەدال ۇلەستىرۋگە قۇقىقتىق تۇرعىدا توسقاۋىل قويۋدى تالاپ ەتتى. سويتكەن ول بۇگىندەرى جالعان اتاق پەن مەدال ۇلەستىرۋ ترەندكە اينالعانىنا زور وكىنىش بىلدىرەتىنىن جەتكىزدى.

«رامىزدەرىمىز مەن مەملەكەتتىك ناگرادالاردىڭ اتاۋىن، كەسكىنىن، كەيبىر ەلەمەنتتەرىن قايتالايتىن  تۇسىنىكسىز ۇيىمداردىڭ ءمان-ماعىناسى جوق وردەن-مەدالدارى، جالعان اتاقتارى، جاۋىننان كەيىنگى ساڭىراۋقۇلاقتاي قاپتاپ كەتكەنى، شىندىق. مۇنداي ءۇردىس ەشكىمگە دە ابىروي اپەرمەيدى، كەرىسىنشە ادامدى داڭعويلىققا، جەڭىل اتاققۇمارلىققا يتەرمەلەيدى. دابىل قاقپاسقا امال جوق!»، دەگەن ءماجىلىس دەپۋتاتى امانجول التايەۆ مەملەكەتتىك رامىزدەردىڭ ەلەمەنتىن قايتالاۋعا قۇقىقتىق تۇرعىدا توسقاۋىل قويۋ قاجەت دەپ سانايدى.

راسىندا، مىنا اقشا بيلەگەن زاماندا كىم كىمدى الداپ جۇرگەنىن اجىراتىپ جاتاتىن بولساق، شىنىمەن دە مي اشىپ، باس شاتاسادى. بارىنەن دە قورقىنىشتىسى، ادامدىققا جات قىلىق - وتىرىككە، جالعاندىققا ەتىمىز ۇيرەنىپ، ءتىپتى ونى جاقسى كورىپ بارا جاتقاندايمىز با، قالاي؟...