پاسپورت بەدەلى بويىنشا قازاقستان بەلارۋس پەن بوتسۆانا اراسىندا تۇر. 
تمد ەلدەرى اراسىندا بەلارۋسسيادان باسقا، مولدوۆا، رەسەي جانە ۋكراينا دا قازاقستاندى باسىپ وزدى. 

Arton Capital قارجىلىق كونسالتينگتىك كومپانياسى ۇسىنعان Passport Index ءتولقۇجاتتاردىڭ الەمدىك رەيتينگىنە سايكەس، الەمدەگى ەڭ بەدەلدى ءتولقۇجات – ءباا پاسپورتى، ونىڭ يندەكسى 179 بالل. يندەكس نەعۇرلىم جوعارى بولسا، ەل پاسپورتى سوعۇرلىم بەدەلدى بولىپ سانالادى.

ءار ەلدىڭ ءتولقۇجاتىنا يندەكس قوياردا ساراپشىلار ۆيزاسىز رەجيممەن كىرۋگە بولاتىن ەلدەردىڭ سانى، ۆيزانى كەلگەننەن كەيىن جاساۋعا مۇمكىندىك جاسالعان ەلدەرى سانى سياقتى كريتەرييلەرگە ءمان بەرەدى.

رەيتينگكە بۇۇ-عا مۇشە 193 ەل، سونداي-اق ۆاتيكان جانە ءوز ءتولقۇجاتتارى بار اۋماقتار (تايۆان، ماكاو، گونكونگ، كوسوۆو جانە پالەستينا) بارلىعى 199 ەلدىڭ ءتولقۇجاتى قاتىستى.

2024 جىلى ەكىنشى ورىندا يندەكسى 177ء-نى قۇراعان بەس ەل — فرانسيا، گەرمانيا، يتاليا، نيدەرلاندى جانە يسپانيا. ءۇشىنشى ورىندا 176 ۇپاي العان بەس ەل – شۆەسيا، فينليانديا، ليۋكسەمبۋرگ، اۆستريا جانە شۆەيساريا.

رەيتينگتەگى سوڭعى ورىنداردى سيريا (93ء-شى)، اۋعانستان (92ء-شى) جانە يراك (91ء-شى) الادى.

رەيتينگكە سايكەس، قازاقستاننىڭ پوزيسياسى ءبىر جىل ىشىندە ايتارلىقتاي جاقساردى. 2023 جىلى 56-ورىننان 2024 جىلى 54-ورىنعا كوتەرىلدى. بۇل رەتتە قوزعالىس ەركىندىگى كورسەتكىشى 91-دەن 90 بالعا دەيىن تومەندەدى. قازاقستاننان باسقا 54-ورىندى كوسوۆو جانە ناۋرۋ مەملەكەتى يەلەندى. 

ايتا كەتەيىك، 2024 جىلى الەمدەگى ورتاشا قوزعالىس ەركىندىگى 111 باللدى، ال مەدياناسى 100 باللدى قۇرادى.

كورشى ەلدەردىڭ اراسىندا قازاقستاندىقتارعا قاراعاندا رەسەي مەن جۇڭگو تۇرعىندارىنىڭ ءتولقۇجاتتارى رەيتينگتە جوعارى تۇر. رەسەي تۋۆالۋ جانە چەرنوگوريا سياقتى ەلدەرمەن بىرگە قوزعالىس ەركىندىگى 127 ۇپايمەن 37-ورىندا، ال جۇڭگو 95 باللمەن 51-ورىندا. وزبەكستان مەن قىرعىزستان ءوز كەزەگىندە گامبيا، ۋگاندا جانە ۇندىستانمەن بىرگە 67 يندەكس كورسەتكىشىمەن 73-ورىندا. تۇرىكمەنستان ماليمەن 77 ۇپايمەن 63-ورىندا تۇر.

سونىمەن قاتار ق ر تۋريزم جانە سپورت ءمينيسترى ەرمەك مارجىقپايەۆتىڭ ايتۋىنشا، قازاقستاندا الەمنىڭ 82 ەلىمەن ۆيزاسىز رەجيم جۇمىس ىستەيدى، ال جۇڭگو مەن ءۇندىستان سياقتى ەلدەردەن كەلۋشىلەر سانى ۆيزاسىز رەجيم ەنگىزىلگەننەن كەيىن ايتارلىقتاي ءوستى: قىتايدان كەلۋشىلەر 12 ەسە، ال ءۇندىستاننان 3 ەسە ارتتى.