بىلتىر ماۋسىمنان بەرى جازاسىن استاناداعى №64 اباقتىدا وتەپ جاتقان ول "24 كۇننەن بەرى ءنار تاتپاي اشتىق جاريالادىم"، دەدى بۇگىنگى سوتتاعى جارىسسوزدە. 

"كۇندە يوگامەن اينالىسامىن. ءبىز كۇندە كىتاپ وقيمىز، سپورتپەن اينالىسامىز. 24 كۇن اشتىق جاريالادىم. ءبىراق قاجەتتى قۇجاتتارىمدى الدىم. ماقساتىما جەتتىم"، دەپ كتك تەلەارناسى سوتتاعى ارىستانبەك مۇحامەدي ۇلىنىڭ ءسوزىن كەلتىرەدى.

ول ءىستى قاراپ جاتقان پروكۋروردىڭ اۋىستىرىلعانىن قالايدى. اڭگىمە استاناداعى "ديپلومات" ءقوناقۇيىن رەيدەرلىك جولمەن تارتىپ الدى دەگەن ايىپقا قاتىستى قىلمىستىق ءىس تۋراسىندا. ءىستىڭ باسى-قاسىندا جۇرگەن مەملەكەتتىك ايىپتاۋشى وتكەن جۇمادا عانا بۇعان دەيىن ەكس-مينيستردى ايىپتى دەپ تاۋىپ، 12 جىلعا قاماۋدى سۇراعان.

مۇحامەدي ۇلى بۇل ءىس بىتكەنىمەن، باسقاسىنىڭ باستالاتىنا سەنىمدى.

ەسكە سالساق، بۇرىنعى مادەنيەت ءمينيسترى بۇعان دەيىن ەكى ءىس بويىنشا ايىپتى دەپ تانىلعان. اۋەلى ۇلتتىق مۋزەيدەگى جەمقورلىق دەرەگى بويىنشا 8 جىل ارقالاسا، كەيىن سول جازانى جەڭىلدەتۋ ءۇشىن ادۆوكاتى ارقىلى پارا بەرىپ، باسى تاعى بالەگە قالدى. سونىمەن العاشىنداعى سەگىز جىل جازاسىنا تاعى ءۇش جىل قوسىلىپ، 11 جىلعا ءبىر-اق كەتتى. سوت ءۇشىنشى ءىس بويىنشا دا كىنالى دەپ تاپقاننىڭ وزىندە، تاعى 12 جىل جازا قوسىلمايدى. زاڭ بويىنشا، ايىپتالۋشى كەسىلگەن ءۇش جازانىڭ ىشىندەگى ەڭ اۋىرىن وتەۋگە ءتيىس.

"مەن سىزگە تاعى سۇحبات بەرىپ جاتىرمىن، تاعى ءىس قوزعايدى. قوزعاي بەرسىن، مەن قورىقپايمىن. نەگە دەسەڭىز، بارلىعىنىڭ ناقتى ءبىر فاكتىسى جوق. ەگەر فاكتى بولسا، پارا الىپ جاتقانىمدى، باسقا بىرەۋمەن كەزدەسىپ جاتقانىمدى كورسەتۋشى ەدى، "مىنە" دەپ"، دەدى سوتتالۋشى ارىستانبەك مۇحامەدي ۇلى