ورازالييەۆتىڭ ايتۋىنشا، اقپان ايىندا ءبورلى اۋداندىق ىشكى ىستەر بولىمىنە اقساي قالاسىنىڭ 70 جاستاعى تۇرعىنى حابارلاسقان. زەينەتكەر الاياقتاردىڭ ايلاسىنا ءتۇسىپ قالعانىن ايتقان. ەر ادام WhatsApp مەسسەندجەرى ارقىلى قوڭىراۋ شالىپ، ءوزىن ۇلتتىق بانك قىزمەتكەرىمىن دەپ تانىستىرىپ، اقشاسىن دەپوزيتتە ساقتايمىن دەگەن جەلەۋمەن 100 ميلليون تەڭگە اۋدارۋدى سۇراعان.
"بۇعان دەيىن ۋچاسكەلىك پوليسەيلەر جابىرلەنۋشىمەن تۇسىندىرمە جۇمىستارىن جۇرگىزگەن. سوعان قاراماستان ەر ادام الاياقتاردىڭ ايلاسىنا ءتۇسىپ قالىپ وتىر. ول اقشانى ءوز بەتىنشە اۋدارعان"، - دەدى باتىس قازاقستان وبلىسى ءىىد باسشىسى.
باس پوليسەيدىڭ ايتۋىنشا، باتىسقازاقستاندىق پوليسەيلەر الاياقتاردان ساقتاۋ ءۇشىن وبلىستىڭ ءۇش مىڭنان استام تۇرعىنىنىڭ شوتىن بۇعاتتاعان.
"ەگەر تەلەفون ارقىلى شوت تۋرالى اقپارات سۇراسا، تۇتقانى قويىپ، وزىڭىزگە قىزمەت كورسەتەتىن بانككە قوڭىراۋ شالىپ، مەنەدجەرلەردەن بارلىعىن انىقتاڭىز. ايتا كەتەرى، قىلمىسكەرلەر باسقا ەلدەردەن دە تەلەفون سوعادى. ولارمەن مەملەكەتتىك تىلدە سويلەسۋگە تىرىسىڭىز. بۇل ءبىزدىڭ كەڭەسىمىز"، - دەدى ارمان ورازالييەۆ.
پىكىر قالدىرۋ