“ۇكىمەتتىڭ 2023 جىلعى 29 تامىزداعى قاۋلىسىنا سايكەس توتەنشە جاعدايلار مينيسترلىگىنىڭ قۇرىلىمىندا 19 "جەدەل-قۇتقارۋ جاساعى" مەملەكەتتىك مەكەمەسى قايتا قۇرىلدى (“جەدەل-قۇتقارۋ جاساعى” "ءورت ءسوندىرۋ جانە اپاتتىق-قۇتقارۋ جۇمىستارى قىزمەتى" مەملەكەتتىك مەكەمەسىنىڭ قۇرامىنان شىعارىلدى). ءقازىر توتەنشە جاعدايلار مينيسترلىگى قۇتقارۋشىلاردى اتتەستاسيادان وتكەن قىزمەتكەرلەر ساناتىنا اۋىستىرۋ ماسەلەسىن قاراستىرىپ جاتىر. وسىلايشا، قۇتقارۋشىلاردىڭ زەينەتكە شىعۋ جاسى تومەندەپ، ولاردىڭ قۇقىعى مەن مارتەبەسى قۇقىق قورعاۋ جۇيەسىندەگى قىزمەتكەرلەردىڭ دارەجەسىمەن تەڭەسپەك”، – دەيدى ولجاس بەكتەنوۆ.

ونىڭ ايتۋىنشا، ازاماتتىق قورعاۋ ورگاندارىنىڭ قىزمەتكەرلەرىنە تۇرعىن ءۇي تولەمدەرىن جاساۋ ماسەلەسى دە قاراستىرىلعان.

“جالپى العاندا بۇل باستاما كوپتىڭ قولداۋىنا يە بولدى. ءقازىر ءتيىستى تۇزەتۋلەر ەنگىزىلىپ جاتىر. ولار الداعى ۋاقىتتا بەلگىلەنگەن تارتىپپەن بەكىتىلەدى”، – دەدى پرەمەر-مينيستر. 

ولجاس بەكتەنوۆ 2023 جىلى اسكەري قىزمەتكەر مەن توتەنشە جاعدايلار مينيسترلىگىندەگى قىزمەتكەرلەردىڭ جالاقىسى ورتا ەسەپپەن 40% كوتەرىلگەنىن ەسكە سالدى. سونداي-اق قۇتقارۋشىلارعا دەنساۋلىعىنا زيان كەلتىرەتىن جانە ومىرىنە ءقاۋىپ توندىرەتىن جۇمىستار ءۇشىن 70%-عا دەيىنگى مولشەردە قوسىمشا اقى تولەنەتىنىن اتاپ ءوتتى.