شىمكەنتتىڭ قىلمىستىق ىستەر جونىندەگى مامانداندىرىلعان اۋدانارالىق سوتى جەزوكشەلەر ۇيلەرىن ۇيىمداستىرىپ، كامەلەتكە تولماعانداردى جەزوكشەلىككە تارتتى دەپ ايىپتالعان 12 ادامعا ۇكىم شىعاردى. 

سىبايلاستار 2019-2022 جىلدار ارالىعىندا شىمكەنت، تاراز جانە قىزىلوردا قالالارىندا جۇمىس ىستەگەن. ولاردىڭ اراسىندا 20-30 جاس ارالىعىنداعى قىز-جىگىتتەر، وسى قالالاردىڭ تۇرعىندارى، سونداي-اق وزبەكستاننىڭ ءبىر ازاماتى بولدى.

“قاسكويلەر 15-16 جاس ارالىعىنداعى كامەلەتكە تولماعان قىزدارعا ينتيمدىك قىزمەت كورسەتكەنى ءۇشىن كۇنىنە 20 000 تەڭگەدەن 200 000 تەڭگەگە دەيىن ۇسىنعان. قىزدار كەلىسىم بەرگەننەن كەيىن ولاردى ارنايى جالدامالى پاتەر نەمەسە ۇيلەرگە ورنالاستىرعان. سونىڭ ىشىندە ولاردى باقىلاۋدا ۇستاپ، تەك كليەنتتەرگە قىزمەت كورسەتكەندە بوساتقان”، – دەلىنگەن حابارلامادا.

جۇمىس ىستەۋدەن باس تارتقانداردى ۇرىپ-سوعىپ ازاپتاعان. جەڭگەتايلىقپەن اينالىسقاندار ەكى قىزعا ىستىق ۇتىك باسقان، سوسىن ولاردى 10 ميلليون تەڭگە قارىز ەتكەن.

تەرگەۋ توپتىڭ قىلمىستارى تۋرالى جەتكىلىكتى دالەلدەمەلەردى جينادى، دەگەنمەن ۇيىمداسقان قىلمىستىق توپتى قۇرۋ جانە باسقارۋ، سونداي-اق ۇيىمداسقان قىلمىستىق توپقا قاتىسۋ جانە ادام ساۋداسى بويىنشا ايىپتى سوت دالەلدەنبەگەن دەپ تانىدى.

كىنالىلەر 6 جىلدان 10 جىلعا دەيىن باس بوستاندىعىنان ايىرىلدى. ۇكىم ءالى زاڭدى كۇشىنە ەنگەن جوق.