الماتى قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ ينفەكسيالىق جانە پارازيتتىك اۋرۋلاردى ەپيدەميولوگيالىق باقىلاۋ ءبولىمىنىڭ باسشىسى الماش احمەتوۆانىڭ سوزىنشە، 1 ناۋرىزدان باستاپ كەنە ينفەكسيالارىنا جانە حالىقتىڭ كەنە شاعۋىنا بايلانىستى مەديسينالىق ۇيىمدارعا وتىنىشتەرىنە اپتا سايىن مونيتورينگ جۇرگىزىلەدى.
«ەپيدەميالىق ماۋسىمنىڭ باسىنان بەرى مەديسينالىق ۇيىمدارعا كەنە شاققان 135 ادام جۇگىندى، ونىڭ 84 بالا. كورسەتكىش 2023 جىلدىڭ سايكەس كەزەڭىمەن سالىستىرعاندا 7،3%-عا جوعارى. بارلىعىنا شۇعىل مەديسينالىق كومەك كورسەتىلدى. كورسەتكىشتەر بويىنشا كەنەگە قارسى يممۋنوگلوبۋلين ەنگىزىلدى»، — دەدى الماش احمەتوۆا.
سپيكەردىڭ سوزىنشە، الماتى قالاسىنىڭ ماڭى كەنە ينفەكسيالارىنىڭ تاسىمالداۋشىسى يكسود كەنەلەرى تارالعان ەندەميالىق ايماققا جاتادى.
«وسى جىلدىڭ باسىنان بەرى قالادا كەنە ينفەكسياسى تىركەلگەن جوق. الماتىدا كەنە شاعۋىنان زارداپ شەككەن ادامدارعا شۇعىل كومەك كورسەتۋ مەديسينالىق ۇيىمداردىڭ 5 تراۆماتولوگيالىق پۋنكتىندە جۇزەگە اسىرىلادى. سەروپروفيلاكتيكا پۋنكتەرى كەنەگە قارسى يممۋنوگلوبۋلينمەن قامتاماسىز ەتىلگەن، ءقازىر 19 ليتر 766 مل بار»، -دەدى مامان.
پىكىر قالدىرۋ