ساپارباي ارىنوۆ ەسىمدى فيزيك-عالىم كەزىندە 60-قا جۋىق عىلىمي ەڭبەك جازىپ، تالاي جاسقا ءتالىم بەرگەن. قازىرگى ۋاقىتتا الماتىداعى قاڭعىباستار مەكەنىندە تۇرىپ جاتىر. عالىمدى ۇل-قىزى جالعىز تاستاپ كەتكەن.

جىعىلعانعا جۇدىرىق بولىپ، بيىل ونى ءبىر توپ جىگىت ۇرىپ-سوعىپ، توناپ كەتىپتى. ءسويتىپ، الەۋمەتتىك بەيىمدەۋ ورتالىعىنا كەلۋدەن باسقا امالى قالماعانىن ايتادى.

الماتىداعى بەلگىلى تۇراعى جوقتارعا ارنالعان بەيىمدەۋ ورتالىعى. ءتۇرلى تاعدىرلار توعىسقان جەر. ءدال وسى جەردە 2 ايدان بەرى فيزيكا-ماتەماتيكا عىلىمدارىنىڭ كانديداتى ساپارباي ارىنوۆ تا تۇرىپ جاتىر.

72-گە كەلگەن قاريا وزگە قاڭعىباستاردان ەرەك. ءۇستى-باسى مۇنتازداي تازا. ءارى قولى قالت ەتسە كىتاپقا ۇڭىلەتىنىن بايقادىق.

سويتسەك، بىلدەي عالىمدى ۇل-قىزى بىرنەشە جىل بۇرىن جالعىز قالدىرىپتى. سودان بەرى زيالى قاۋىم وكىلى پاتەر جالداپ، ءوز كۇنىن كورگەن. ال، بيىل ءبىر توپ جىگىتتىڭ شابۋىلىنا تاپ بولىپ، قاڭعىباستار مەكەنىنە كەلۋگە ءماجبۇر بولعانىن ايتادى.

 «5 بالا جابىلىپ، ءاميانىمدى الىپ كەتتى. ونىڭ ىشىندە اقشا، قۇجاتتارىم بار ەدى»، - دەيدى فيزيكا-ماتەماتيكا عىلىمدارىنىڭ كانديداتى ساپارباي ارىنوۆ.

 مۇندا وعان ءتيىستى ەم-دوم جاسالعان. ءقازىر دەنساۋلىعى قالپىنا كەلگەندەي. قاريا كەزىندە يادرولىق فيزيكا ينستيتۋتىندا جەمىستى ەڭبەك ەتىپتى.ءتىپتى زەرتحانا مەڭگەرۋشىسى قىزمەتىنە دەيىن كوتەرىلگەن. 60-قا تارتا عىلىمي ەڭبەگى بار. مەكتەپ وقۋشىلارى مەن ستۋدەنتتەرگە ساباق تا بەرگەن. وتكەن ءومىرىن ساعىنىشپەن ەسكە العان عالىم ءقازىر دە قاراپ جاتقان جوق.

ساپارباي ارىنوۆتىڭ ەلىمىزدەگى فيزيكا عىلىمىنىڭ دامۋىنا زور ۇلەس قوسقانىن بۇرىنعى ارىپتەستەرى دە راستادى. ءارى ونسىزدا فيزيكتەر ازدا ونىڭ قاڭعىباستار مەكەنىندە تۇرىپ جاتقانىنا الاڭداۋلى.

«كەڭەس وداعىنداعى بەلگىلى فيزيكتەردىڭ قاتارىنا كىرەتىن. سوندىقتان ۋاقىتىندا ءبىزدىڭ ينستيتۋتتا ىستەگەندە ول قوماقتى ۇلەس قوستى دەپ ايتا الامىن»، - دەيدى يادرولىق فيزيكا ينستيتۋتى باس ديرەكتورىنىڭ ورىنباسارى ناسىروللا بۇرتەبايەۆ.

قاڭعىباسقا اينالعان فيزيك ءقازىر اۆتورلىق كىتابىن جازىپ جاتىر. دەسە دە، مۇندا عىلىممەن اينالىسۋ ءۇشىن قولايلى جاعداي جوق. سوندىقتان، ءوزى قارتتار ۇيىنە اۋىسقىسى كەلەدى. ءبىراق، ول ازىرگە مۇمكىن بولماي تۇر.

 «قارتتار ۇيىنە بارعىسى كەلەدى. ال، قارتتار ۇيىنە بارۋ ءۇشىن ونىڭ بالالارى زاڭ تۇرىندە باس تارتۋى كەرەك. قارامايمىز، باقپايمىز دەۋى ءتيىس. سول كەزدە عانا ءبىز ونى قارتتار ۇيىنە تاپسىرا الامىز»، - دەيدى الماتى قالالىق الەۋمەتتىك بەيىمدەۋ ورتالىعى ديرەكتورىنىڭ ورىنباسارى قازبەك جىلقىبەكوۆ.

 دەسە دە، قاريانىڭ 2 بالاسى ۇشتى-كۇيلى جوق. اكەسىن ىزدەپ بىردە-بىر رەت كەلمەگەن. ال، عالىمنىڭ ءوزى مۇنىڭ ءبارىن سىناق دەپ ەسەپتەيدى. كەلەر جىلى قايتا عىلىم الەمىنە ورالىپ، جاستارعا ءدارىس بەرۋدى دە جوسپارلاپ وتىر.