قۇرمەتتى اتا-انالار مەن تۇلەكتەر! 25 مامىردا ەلىمىزدىڭ بارلىق مەكتەپتەرىندە وقۋ جىلىنىڭ اياقتالۋىنا ارنالعان سىنىپ ساعاتتارى وتكىزىلەدى. سالتاناتتى ءىس-شارالار بارىسىندا پوليسيا ورگاندارى قوعامدىق ءتارتىپ پەن جول قاۋىپسىزدىگىن قامتاماسىز ەتۋ بويىنشا بارلىق شارالاردى قابىلدايتىن بولادى. ىشكى ىستەر ءمينيسترىنىڭ تاپسىرماسى بويىنشا ءاربىر وقۋ ورنىنا جاۋاپتى پوليسيا قىزمەتكەرى بەكىتىلدى. پاترۋلدىك ناريادتار ءىس-شارالار وتكىزىلەتىن ورىندارعا بارىنشا جاقىن بولادى. سوڭعى جىلدارداعى تاجىريبەگە سۇيەنسەك، مەكتەپتەردەگى “سوڭعى قوڭىراۋلار” اياقتالعاننان كەيىن اتا-انالاردىڭ رۇقساتىمەن كوپتەگەن تۇلەكتەر ءىس-شارالاردى ءوز بەتىنشە جالعاستىرادى. وكىنىشكە قاراي، جاسوسپىرىمدەردىڭ كولىك تىزگىندەۋى قايعىلى وقيعالارعا اكەلىپ جاتادى. وتكەن جىلى مۇنداي فاكتىلەر جامبىل، اتىراۋ وبلىستارى مەن الماتى قالاسىندا ورىن الدى، - دەدى شىڭعىس الەكەشيەۆ.

ودان بولەك، اتا-انالاردىڭ باقىلاۋىنسىز بالالار تىيىم سالىنعان جەرلەردە سۋعا ءتۇسىپ جاتادى. بىلتىر اقمولا، ماڭعىستاۋ جانە اتىراۋ وبلىستارىنداعى سۋ ايدىندارىنىڭ شومىلۋعا جابدىقتالماعان جەرلەرىندە جاسوسپىرىمدەردىڭ سۋعا كەتۋ جاعدايلارى تىركەلدى.

وسىنى ەسكەرە وتىرىپ، اتا-انالار مەن تۇلەكتەردى مىنەز-قۇلىقتىڭ قاجەتتى نورمالارى مەن ەرەجەلەرىن ساقتاۋعا شاقىرامىز. قۇقىق بۇزۋشىلىقتار انىقتالعان جاعدايدا دەرەۋ 102 ارناسىنا، ال توتەنشە جاعدايلار تۋىنداعان كەزدە 112 نومىرىنە حابارلاسۋدى سۇرايمىز، – دەدى دەپارتامەنت باستىعى – ءىىم رەسمي وكىلى شىڭعىس الەكەشيەۆ.