جۇت جەتى اعايىندى. وعان داعدارىستى تاعى قوسىڭىز. دەمەك ءبىز ءومىر ءسۇرىپ جاتقان داۋىردە جۇتقا تاعى ءبىر اعايىن كەلىپ قوسىلعان. بۇكىل الەمدى شارپىعان ەكونوميكالىق داعدارىس ءبىزدىڭ ەلدى دە اينالىپ وتپەسى انىق. اينالىپ وتپەدى، تۋرا كەلدى. اسىرەسە، ءبىزدىڭ كورشىمىز ءارى وداقتاسىمىز رەسەيگە جان- جاقتان سانكسيالار سالىپ جاتقاندا بىزگە داعدارىس تولقىنى جەڭىل تيمەسى بەلگىلى. بىردەن وڭدىرمادى، ءتول تەڭگەمىز اينالاسى ءبىر جىل ىشىندە 50%- عا جۋىق قۇنىن جوعالتتى، زات باعاسى كۇن ساناپ قىمباتتادى. ءبىراق ۇكىمەتىمىز «كورەتىندەرىڭ ءالى الدا، وتە ۇلكەن داعدارىس كەلە جاتىر»،- دەپ قورقىتادى.

«جاۋ جاعادان العاندا، ءبورى ەتەكتەن» دەگەندەي داعدارىسپەن بىرگە ۇكىمەت تە جەكەشەلەندىرۋدىڭ ەكىنشى كەزەگىندەگى نىسانداردى جاريا ەتتى. «قازمۇنايگاز»، «قازاقفيلم»، «KEGOK»، «تۇرعىن ءۇي جيناق بانكى» سياقتى ءوندىرىس، مادەنيەت، كوممۋنالدىق قىزمەتتەردىڭ ءبارىن قامتىعان 278 نىسان وزىنە جاڭا قوجايىن ىزدەۋدە.  ساتىلىمعا شىقتى، ەندى كىم ساتىپ الىپ، كىمنىڭ قانجىعاسىندا كەتىپ، كىمگە جەم بولىپ، بولاشاقتا نە كۇي كەشەمىز دەگەن سۇراق ءبارىمىزدى مازالايدى. قاراعاندىنىڭ كومىرى، جەزقازعاننىڭ مىسى سياقتى تاعى دا شەتەلدىكتەردىڭ قولىنا كەتىپ، ءبىر ەلدىڭ سالىپ بەرگەن ۇيىندە، ءبىر ەلدىڭ جارىعىن جاعىپ، ءبىر ەلدىڭ سارايىنا بارىپ كونسەرت كورەمىز بە؟

وسى جىلدىڭ ناقتى مالىمەتتەرىنە سۇيەنسەك، قازاقستاندىقتاردىڭ تاۋەلسىزدىكتەن بەرى ءتۇرلى جولدارمەن شەتەلدە تىققان اقشالارى 138 ميلليارد دوللاردان اسقان ەكەن. بۇل بىزگە ءمالىم بولعانى عانا. تاعى دا قانشا قارجى سىرتقا شىققانى ءبىر اللاعا عانا ايان. ال، قاراپايىم قازاق ءوز جەرىندە ءبىر باسپاناعا زار بولىپ جۇرسە، 500 مىڭنان استام قازاقستاندىقتىڭ شەتەلدە جەكە ۇيلەرى بار ەكەن. ەلىمىزدەگى باي مەن كەدەيدىڭ الشاقتىعى سونشاما ميلليونعا جۋىق حالىق نانىن ارەڭ تاۋىپ جەپ وتىرسا، ەڭ باي 50 ادامىنىڭ بايلىعى ءۇش وبلىستىڭ (اقمولا، جامبىل جانە سولتۇستىك قازاقستان) ىشكى ونىمىنەن اسىپ تۇسەدى ەكەن.   ءبىزدىڭ ەل بايلىعىن سىرتقا تاسيتىن وسىنشاما بايلارىمىزدىڭ ىشىنەن قازاققا قورعان بولار بىرەۋى تابىلماي ما؟ داعدارىس كەزىندە ۇكىمەت تە ءبىزدىڭ وسىناي كاسىپكەرلەمىزگە سەنگەندىكتەن، وزدەرى يەلىك ەتە الماعان نىسانداردى كوتەرۋ ءۇشىن ولاردان كومەك سۇراۋ قادامىنا كوشكەن بولار. ۇكىمەت كومەك سۇراسا، ولار ىسكە كىرىسەتىن ۋاقىتى كەلدى. ويتكەنى، ءسىز بەن ءبىز جانە قازاقتىڭ وتكەنى مەن بۇگىنى بولماسا، ولار بۇل بايلىققا جەكە -دارا قول جەتكىزە الماس ەدى. دەمەك، ولار ەل قارجىسىن شەتكە تىعا بەرمەي، ءوز حالىقىنىڭ قالاي كۇن كورىپ جاتقانىنا ءمان بەرىپ، حالىقتان العانىن حالىققا قايتا قايتاراتىن، ەل ەرتەڭىن تۇزەيتىن، ۇرپاققا الاڭسىز ءومىر سىيلايتىن ۇلتتىڭ ازاماتىنا اينالۋى كەرەك.

دالالىق كوشپەندىدەن قالالىق كوشپەندىگە اينالعان قازاقتى ۇكىمەت باسپانالى ەتۋگە قاۋقارسىزدىق تانىتىپ، اقىرى بۇل جاۋاپكەرشىلىكتى وزگەنىڭ مويىنىنا جۇكتەۋگە نيەت ەتۋدە. ءبىزدىڭ ەلدە بۇل جاۋاپكەرشىلىكتى مويىنىنا الا الاتىن ادامداردىڭ قارجىلىق جاعدايىنىڭ ابدەن جەتەتىنىن جوعارى دا ايتىپ كەتتىم. ەندى تەك، سولاردىڭ ىشىنەن ۇلتقا دەگەن ماحابباتى بۇل جاۋاپكەرشىلىكتى مويىنىنا الۋعا جەتەتىن قازاق تابىلسا دەگەن تىلەك قانا بار. باسپانا ماسەلەسى قازاقتىڭ ءوسىپ- ونۋىنە تىكە قاتىستى، وزەكتى ماسەلە. «تۇرعىن ءۇي جيناق بانكىن» ءوز يەلەگىنە الىپ، بانك سەكتورىن دامىتىپ، حالىقتى باعاسى لايىقتى باسپانامەن قامتاسىز ەتەر بولسا، بۇنداي جاۋپكەرشىلىكتى العان ادامنىڭ ۇلت الدىندا ابرويى اسقاق بولار ەدى.

ءقازىر ءبىزدىڭ ۇكىمەت دەگەنىنە جەتپەي قويمايتىن بولدى عوي، ساتام دەگەنىن ساتادى. سوندىقتان، جوعارىداعى نىساندار ۇستاعاننىڭ قولىندا، تىستەگەننىڭ اۋىزىندا  كەتپەس ءۇشىن ءبىزدىڭ قالتالى ازاماتتار ۇلتتىق بۋرجۋازياعا اينالۋى ءتيىس. قارجىسىن شەتەلگە تىققانشا،  قازاقتىڭ بولاشاعىنا جۇمسار بولسا، ۇلتتىڭ الدىندا دا، اللانىڭ الدىندا دا ارى تازا بولۋمەن بىرگە- قۇرمەتى شەكسىز بولار ەدى.

تۇردىبەك قۇرمەتحان