بيىلعى اقپاندا الەۋمەتتىك جەلىدە سەمەيدە ورىن العان وقيعانىڭ بەينەجازباسى تارادى. ءۇش-تورت ءجاسوسپىرىم ءبىر بالاعا قورقاۋشا جابىلىپ، تەپكىلەپ، قورلاپ جاتقان كورىنىس قوعامدا ۇلكەن رەزونانس تۋدىردى. بۇدان كەيىن 11 جاستاعى ءالينۇردىڭ ءومىرى وزگەردى مە، مەملەكەت تاراپىنان وعان قانداي كومەك كورسەتىلدى؟

ءجابىر كورگەن بالا مەن ونىڭ وتباسىنا مەملەكەتتىك ورگاندار ءالى كۇنگە جاردەم كورسەتىپ جاتقانى بەلگىلى بولدى. CMN جازعانداي، ماماندار بالانىڭ دەنساۋلىعى مەن پسيحوەموسيونالدىق جاعدايىن باقىلاۋدا ۇستاپ وتىر. سوتتا اتا-اناسىنىڭ مۇددەسىن قورعايتىن ادۆوكات تاعايىندالدى. وسى وقيعاعا بەي-جاي قاراي الماعاندار قاراجات جيناپ، بالانىڭ وتباسى پاتەر ساتىپ الدى. سونداي-اق ءجابىر كورگەن بالا مەن ونىڭ اپكەسىن وزدەرى تاڭداعان مەكتەپكە اۋىستىردى.

اباي وبلىسىنىڭ بالا قۇقىقتارى جونىندەگى وڭىرلىك ۋاكىلى ەلزيرا سولتانبايەۆا: «مەملەكەت، مەكتەپ جانە مەديسينالىق مەكەمەلەر تاراپىنان قولداۋ كورسەتىلدى. وتباسىنىڭ ادۆوكاتى بار. ول بارلىعىن باقىلاۋدا ۇستاپ وتىر. پسيحولوگتار دا جۇمىسىن جالعاستىرادى. بۇل ءبىر كۇننىڭ جۇمىسى ەمەس»، — دەيدى.
ىشكى ىستەر مينيسترلىگىنە قاراستى «دينامو» دەنەشىنىقتىرۋ-سپورت قوعامى ءالينۇردى ءوز قامقورلىعىنا الدى. وبلىستىق ءبىلىم باسقارماسى باسشىسىنىڭ مىندەتىن اتقارۋشى اسەم نۇسكەنوۆا: «وسى وقيعادان كەيىن ءبىز بىردەن پوليسياعا حابارلاستىق. بالالاردىڭ وكىلدەرى، پسيحولوگ، بالا قۇقىقتارى جونىندەگى ۋاكىل، ءبارىمىز ءتۇننىڭ ورتاسىنا دەيىن پوليسيا بولىمىندە بولدىق. ءبىر جىل بۇرىن وبلىستا پسيحولوگيالىق جاردەم بەرەتىن ورتالىق اشىلعان بولاتىن. ورتالىق پسيحولوگتارى بالالارمەن جۇمىس ىستەي باستادى»، — دەدى.

ال ءالينۇرعا ءجابىر كورسەتكەندەرگە قانداي جازا قولدانىلدى؟

ەڭ الدىمەن وبلىستىق ءبىلىم باسقارماسىنىڭ قىزمەتكەرلەرى كامەلەتكە تولماعاندار ىستەرى جونىندەگى قالالىق، سودان كەيىن وبلىستىق كوميسسيادا ءارقايسىسىنىڭ ارەكەتىن سارالادى. سودان كەيىن التى ءجاسوسپىرىمنىڭ ءىسىن سوتقا جىبەردى.

اباي وبلىستىق سوتىنىڭ شەشىمىمەن 13 جانە 16 جاستاعى قىزدار ديەۆيانتتى مىنەز-قۇلقى بالالارعا ارنالعان مامانداندىرىلعان مەكتەپكە ءتورت ايعا جىبەرىلدى. ولاردىڭ بىرنەشە رەت زاڭ بۇزعانى انىقتالدى: قوعامدىق ورىنداردا ىشىمدىك ىشكەن، تۇندە قايدا جۇرگەنى بەلگىسىز، ۇيىندە قونباعان. ال 13 جاسار بالا ايرىقشا ۇستاۋ رەجيمىندەگى مەكتەپكە ورنالاستىرىلدى. ول ەكى ايدىڭ ىشىندە ەكى قىلمىستىق ءىس جاساعان، ءبىراق ول كەزدە قىلمىستىق جاۋاپكەرشىلىككە تارتىلاتىن جاسقا جەتپەگەن. بالا قاڭتار ايىنان بەرى يۋۆەنالدىق پوليسيا تىركەۋىندە تۇرعان.

ايتا كەتك كەرەك، مەكتەپ باسشىلىعى وسى بالالاردىڭ قۇجاتىن كامەلەتكە تولماعاندار ىستەرى جونىندەگى كوميسسيا قاراۋىنا بىرنەشە رەت جىبەرگەن كورىنەدى. الايدا جاسىنا بايلانىستى ەسەپكە قويۋ مۇمكىن بولماعان.

كۇنى كەشە اباي وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى مەكتەپ وقۋشىسىن سوققىعا جىققان جەتكىنشەكتەردىڭ اتا-انالارىنا قاتىستى ۇكىم شىعاردى.

سوت شەشىمىمەن ولار اتا-انالىق مىندەتتەرىن تيىسىنشە ورىنداماۋىنىڭ اكىمشىلىك جازاعا اكەلىپ سوعۋى بابى بويىنشا كىنالى دەپ تانىلدى.
اتا-انالاردىڭ ءبىرى بەس تاۋلىككە اكىمشىلىك قاماۋعا الىندى. تورتەۋىنە 78 640 تەڭگە مولشەرىندە ايىپپۇل سالىندى.
سوتتىڭ باسپا ءسوز قىزمەتى حابارلاعانداي، اتا-انالار بالالارىنىڭ مىنەز-قۇلقىن، ءجۇرىس-تۇرىسىن دۇرىس قاداعالاماعان. سوت شەشىم شىعاراردا بارلىق ءمان-جايدى ەسكەردى.