"قازمۇنايگاز" ۇلتتىق كومپانياسىنىڭ باسقارما ءتوراعاسىنىڭ ورىنباسارى بولىپ قازبەك قۇسايىنوۆ تاعايىندالدى. ول كومپانيادان ءوز ەركىمەن كەتكەن سەرىكقالي برەكەشيەۆتىڭ ورنىنا كەلدى.

كومپانياسىنىڭ باسپا ءسوز قىزمەتىنىڭ Telegram-داعى ارناسىنىڭ حابارلاۋىنشا، "قازمۇنايگاز" ۇلتتىق كومپانياسىنىڭ ۇيىمدىق قۇرىلىمىنىڭ وزگەرۋىنە، "قمگ ينجينيرينگ" ج ش س قۇزىرەتتەر ورتالىعى قىزمەتىنىڭ كەڭەيۋىنە بايلانىستى كەيبىر بلوكتاردىڭ فۋنكسيالارى قايتا قارالدى. اتاپ ايتقاندا، كورپوراتيۆتىك دامۋعا جاۋاپتى بلوك كۇشەيتىلدى، ال گاز جوبالارىن باسقارۋ باعىتى مۇناي جانە گاز ءوندىرۋ بلوگىنا قايتا بەرىلدى.

"قازبەك قايناربەك ۇلى قۇسايىنوۆ قمگ-نىڭ ستراتەگيالىق جانە كورپوراتيۆتىك دامۋىنا، تۇراقتى دامۋ مەن ESG، جوبالاردى باسقارۋ تيىمدىلىگىن ارتتىرۋعا، سونداي-اق دەكاربونيزاسيا جانە ەكولوگيا ماسەلەلەرىنە جەتەكشىلىك ەتەتىن بولادى"، - دەلىنگەن حابارلامادا.

ايتا كەتەيىك، قازبەك قۇسايىنوۆ ەڭبەك جولىن 2000 جىلى "قازترانسويل" كومپانياسىندا اكىمشىلىك دەپارتامەنتىنىڭ مامانى بولىپ باستادى. ءار جىلدارى "قازمۇنايگاز" ۇلتتىق كومپانياسىنىڭ اكتيۆتەردى باسقارۋ دەپارتامەنتىنىڭ باس مامانى، "قازترانسگاز" كومپانياسىندا باسشىلىق قىزمەتتەردى اتقاردى. M&SE ج ش س باس ديرەكتورىنىڭ ورىنباسارى بولىپ جۇمىس ىستەدى. 2023 جىلدىڭ تامىز ايىنان باستاپ "قازترانسويل" كومپانياسىنىڭ ديرەكتورلار كەڭەسىنىڭ مۇشەسى — تاۋەلسىز ديرەكتورى بولدى.