تالدىقورعاندا شەرزات بولاتتىڭ ولىمىنە قاتىستى ءىس بويىنشا سوت پروسەسى جالعاسىپ جاتىر. سۋديا بلوگەرلەر مەن الەۋمەتتىك جەلى قولدانۋشىلارىنا ەسكەرتۋ جاسادى.

سۋديا ەرجان جانۇزاقوۆتىڭ سوزىنشە، پروسەستى تالقىلاۋعا، تەرگەۋ مەن سوتتىڭ جۇمىسىنا باعا بەرۋگە جول بەرىلمەيدى. بۇل سوتقا قىسىم رەتىندە باعالانۋى مۇمكىن.

"الەۋمەتتىك جەلىلەردە بلوگەرلەر مەن سوت پروسەسىنە ەشقانداي قاتىسى جوق باسقا ازاماتتار جەكە پىكىر ءبىلدىرىپ، تەرگەۋ ارەكەتتەرى مەن سوت پروسەسىنىڭ بارىسىنا سۋبەكتيۆتى باعا بەرىپ جاتىر. قازاقستان رەسپۋبليكاسى كونستيتۋسياسىنىڭ 75-بابىنىڭ 1-تارماعىنا سايكەس قازاقستان رەسپۋبليكاسىندا سوت تورەلىگىن تەك سوت جۇزەگە اسىراتىنىن ەسكە سالامىز. سوتتىڭ سوت تورەلىگىن ىسكە اسىرۋ جونىندەگى قىزمەتىنە ارالاسۋعا جول بەرىلمەيدى جانە زاڭ بويىنشا جاۋاپكەرشىلىككە اكەپ سوعادى"، - دەدى سۋديا.

ول سوت پروسەسى اياقتالعانعا دەيىن، ۇكىم شىعارىلعانعا جانە زاڭدى كۇشىنە ەنگەنگە دەيىن سوت پروسەسىنە پىكىر ءبىلدىرۋ، قۇقىقتىق باعا بەرۋ زاڭسىز ەكەنىن مالىمدەدىى.

"سوت ءىستىڭ بارلىق ءمان-جايىن جان-جاقتى، تولىق تەكسەرۋگە، ايىپتاۋشى تاراپتىڭ دا، قورعاۋشى تاراپتىڭ دا دالەلدەرىن تەكسەرۋگە مىندەتتى. ءىستى قارايتىن سۋديا تاۋەلسىز جانە وبەكتيۆتى بولۋى كەرەك، پروسەستىڭ ناتيجەسىنە جەكە قىزىعۋشىلىعى بولماۋى كەرەك جانە ءۇشىنشى تۇلعالاردىڭ ىقپالىنا تۇسپەۋى كەرەك. سوت بەيتاراپ تورەشى رەتىندە ارەكەت ەتەدى جانە تەك زاڭ نەگىزىندە شەشىم قابىلدايدى"، - دەدى ول.