«العا، قازاقستان» وپپوزيسيالىق پارتياسىنىڭ جەتەكشىسى، تانىمال مارافونشى مارات جىلانبايەۆ ءقازىر تۇرمەدە جەكە زاتتارىنان ايىرىلىپ، ەدەندە ۇيىقتاۋعا ءماجبۇر.
14 مامىردا جىلانبايەۆ وتباسىنا قوڭىراۋ شالىپ، تۇرمە قىزمەتكەرى توسەك جايماسىن، ورامالىن، ساعاتىن، دارى-دارمەگىن جانە كۇنتىزبەسىن الىپ كەتكەنىن، ءارى ەش تۇسىنىكتەمە بەرىلمەگەنىن جەتكىزگەن.
– ادەتتە مارات سارسەنبى سايىن حابارلاسادى. بۇل جولى دا حابارلاستى، ءبىراق ەرەكشە قوبالجىپ تۇردى. ول ءوزىنىڭ تارتىپتىك يزولياتوردا وتىرعانىن جانە بۇل ارەكەتتەردىڭ مورالدىق قىسىم ەكەنىن ايتتى، – دەدى ايەلى.
جىلانبايەۆ ءساۋىر ايىندا اشتىق جاريالاپ، ونى 40 كۇننەن كەيىن، 4 مامىردا، دەنساۋلىعىنا بايلانىستى توقتاتقان. جۇبايىنىڭ ايتۋىنشا، اعزاسى قاتتى السىرەپ، ديارەيا بولىپ، دارىگەرلەر وعان تەك لينەكس پەن فەستال بەرگەن.
سونداي-اق، ەكى ايدان بەرى وعان گازەت-جۋرنالدار بەرىلمەيدى، حات الماسۋعا دا مۇمكىندىك جوق. ايەلىنىڭ ايتۋىنشا، جىلانبايەۆ قۇقىق قورعاۋشىلاردان ەندى گازەت جىبەرمەۋدى سۇراعان.
– ول جايمالارى الىنعان سوڭ ەدەندە جاتۋعا ءماجبۇر. ماعان: «كەلەسى سارسەنبىدە حابارلاسپاسام، باسىما بىردەڭە بولدى دەپ بىلىڭدەر»، – دەدى. نە ىستەرىمدى بىلمەي وتىرمىن، – دەيدى جۇبايى.
ازاتتىق ستەپنوگورسك قالاسىنداعى №4 تۇزەۋ مەكەمەسىنىڭ باسشىسى قانات تۇلاقوۆقا بىرنەشە رەت حابارلاسقانىمەن، جاۋاپ الا الماعان. قىلمىستىق اتقارۋ جۇيەسى كوميتەتىنە رەسمي سۇراۋ جىبەرىلگەنىمەن، جاۋاپ ءالى كەلمەگەن.
2023 جىلعى قاراشادا استانا قالالىق سوتى مارات جىلانبايەۆتى «ەكسترەميستىك ۇيىم ىسىنە ارالاستى» جانە «ەكسترەميزمدى قارجىلاندىردى» دەگەن ايىپپەن 7 جىلعا باس بوستاندىعىنان ايىرعان. ول بۇل ايىپتاۋلاردى جوققا شىعارىپ، ءىستىڭ ساياسي استارى بار ەكەنىن ايتقان. قازاقستاندىق قۇقىق قورعاۋشىلار ونى ساياسي تۇتقىن دەپ تانىدى.
ال رەسمي بيلىك ەلدە ساياسي تۇتقىن جوق، ەشكىم پىكىرىنە بولا قۋدالانبايدى دەگەن ۇستانىمدا.
الايدا، حالىقارالىق ۇيىمدار قازاقستاندى مارات جىلانبايەۆتى بوساتۋعا ۇندەپ كەلەدى. جاقىندا International Partnership for Human Rights ۇيىمى وعان تاعىلعان ايىپتاردى بەيبىت وپپوزيسيالىق قىزمەتى ءۇشىن جازالاۋ دەپ باعالادى.
