الماتى. قازاقپارات - ءسۇت بەزى ىسىگىنىڭ العاشقى كەزەڭىندەگى ناۋقاستى ەمدەۋ مەملەكەتكە 120 مىڭ تەڭگەگە تۇسەدى، ال 4ء-شى كەزەڭدە 28 ملن تەڭگە جۇمسالادى. بۇل تۋرالى بۇگىن الماتىدا قازاق ونكولوگيا جانە راديولوگيا عزي-ىندا ءوتىپ جاتقان «ءسۇت بەزى قاتەرلى ىسىگىنىڭ جۇيەلى تەراپياسى» عىلىمي-پراكتيكالىق كونفەرەنسياسى بارىسىندا اتالمىش ينستيتۋت ديرەكتورى قۋانىش نۇرعازييەۆ ايتتى. 
حالىقارالىق جيىنعا الەمنىڭ ءار ەلىنەن 200-گە تارتا دەلەگات قاتىسۋدا. 

ولاردىڭ قاتارىندا دەنساۋلىق ساقتاۋ باسقارماسىنىڭ وكىلدەرى، ونكولوگيالىق ديسپانسەر قىزمەتكەرلەرى مەن باس دارىگەرلەرى، ونكولوگتار مەن ماممولوگتار، حيميوتەراپيەۆتەر، قالالىق جانە وبلىستىق ونكوديسپانسەر حيرۋرگتەر ەلىمىزدە ءسۇت بەزى قاتەرلى ىسىگىن ەمدەۋدە ءتيىمدى ادىستەر مەن تاسىلدەردى ەنگىزۋ ماسەلەلەرىن تالقىلاپ جاتىر. 

مامانداردىڭ ايتۋىنشا، ددسۇ-نىڭ مالىمەتىنە سايكەس، جىل سايىن 1 ملن اسا ايەل وسى دەرتپەن اۋىرادى. وعان قوسا، ماماندار بۇل اۋرۋدىڭ جىلدان-جىلعا «جاسارىپ» كەلە جاتقانىن ايتادى. ال قازاقستاندا ومىراۋ قاتەرلى ىسىگى ونكواۋرۋلار اراسىندا ءبىرىنشى ورىندا، ال ءولىم-جىتىم كورسەتكىشى بويىنشا ءۇشىنشى ورىندا تۇر.

«قازاقستاندا ق ر مەملەكەت باسشىسىنىڭ قولدانىپ وتىرعان ساياساتىنىڭ ارقاسىندا ونكولوگيالىق ناۋقاستاردى ەمدەۋ، دياگنوستيكا، ساۋلە ەمى، دارى-دارمەك تەگىن ءارى زاماناۋي وزىق تەحنولوگيالارعا سايكەس جۇرگىزىلەدى. ەلىمىزدە جىل سايىن 4 مىڭ ايەل اتالعان كەسەلگە شالدىعادى. بۇل جەردە ءار ايەل ءوز دەنساۋلىعىنا دەگەن جاۋاپكەرشىلىكتى سەزىنۋى كەرەك. ەگەر ول ۋاقىتىندا دارىگەرگە قارالىپ وتىرسا، ءوزىنىڭ دە ءومىرىن ۇزارتادى. العاشقى ساتىداعى ناۋقاستى ەمدەۋگە مەملەكەت 120 مىڭ تەڭگە جۇمسايدى. ال اسقىنعان 4 ساتىداعى ناۋقاستى ەمدەۋگە 28 ملن تەڭگە جۇمسالادى»، - دەدى قۋانىش نۇرعازييەۆ. 

ونىڭ ايتۋىنشا، ءسۇت بەزى قاتەرلى ىسىگى اۋرۋىنىڭ جىلدان-جىلعا ارتۋىنىڭ سەبەبى تەك دياگنوستيكالىق فاكتوردىڭ جاقسارعانىنا عانا بايلانىستى ەمەس.

«قازىرگى ايەلدەردىڭ ءومىر ءسۇرۋ سالتى وزگەرگەن. بۇرىنعىداي كوپ جۇكتىلىك جوق. بالانى بۋىنى بەكىگەنشە ەمىزبەيدى. قانشاما ابورت جاسالىپ جاتىر. بۇل دا ءسۇت بەزى قاتەرلى ىسىگىنىڭ دامۋىنىڭ ءبىر فاكتورى»، - دەدى ق.نۇرعازييەۆ. 

ايتا كەتۋ كەرەك، قازان ايى بۇكىلالەمدىك ءسۇت بەزى قاتەرلى ىسىگىمەن كۇرەس ايى دەپ اتالدى. اتالعان ايلىققا بايلانىستى الەمنىڭ ءار تۇكپىرىندە كەسەلگە قارسى كۇرەسكە قاتىستى ءتۇرلى شارالار ءوتىپ جاتىر. 

1 قازاننان باستاپ استانادا «بايتەرەك» مونۋمەنتى، «تۇلپار» كوپىرى، الماتىدا بالۋان شولاق اتىنداعى سپورت سارايى كەشكە قاراي جارىق ارقىلى كۇلگىن تۇسكە بويالادى. كۇلگىن ءتۇس - قاتەرلى ىسىككە قارسى كۇرەس قوزعالىسىنىڭ سيمۆولى. وسىلايشا وتاندىق ماممولوگ ماماندار ايەلدەر مەن قىزداردىڭ نازارىن قاتەرلى ىسىكپەن كۇرەسۋگە، ونىڭ الدىن الۋعا، دەر كەزىندە ەمدەلۋگە شاقىرۋدى ماقسات تۇتىپ وتىر. 

بۇل اكسيا قازاننىڭ سوڭىنا دەيىن جالعاسادى. مۇنداي اكسيا رەسەيدە، ۋكراينادا دا ءوتىپ جاتىر.

دەرەككوز: قازاقپارات