استانا. قازاقپارات - استانا تورىندە ديريجەر، مەملەكەتتىك «دارىن» جاستار سىيلىعىنىڭ لاۋرەاتى، مادەنيەت سالاسىنىڭ ۇزدىگى، قازاقستان كومپوزيتورلار وداعىنىڭ مۇشەسى ەركىن نۇرىمبەتوۆتىڭ شىعارماشىلىق جەكە كونسەرتى تابىستى ءوتتى.
ايتا كەتۋ كەرەك، ەركىن نۇرىمبەتوۆ قىزىلوردا قالاسىندا تۋىپ-وسكەن. الماتى قالاسىنداعى قۇرمانعازى اتىنداعى كونسەرۆاتوريانىڭ تۇلەگى، ايتقالي جايىموۆتىڭ شاكىرتتەرىنىڭ ءبىرى. كوپتەگەن حالىقارالىق جانە رەسپۋبليكالىق كونكۋرستاردىڭ لاۋرەاتى، «دارا تۇلعا - نۇرعيسا» اتتى مۋزىكالىق پوەماسى قوعامدىق ماڭىزى بار شىعارما رەتىندە مەملەكەتتىك گرانتتى جەڭىپ العان. ول بارلىق جەتىستىكتەرىم اۋەلى اللانىڭ، ودان كەيىن اتا-انامنىڭ جانە ۇستازدارىمنىڭ ارقاسى دەپ ەسەپتەيدى. مۋزىكا مەكتەبىندەگى العاشقى ۇستازى ماحامبەت مامبەتنازاروۆ، ايتبەرگەن جاڭبىرشييەۆ، ەرمۇرات ۇسەنوۆ، ال كونسەرۆاتورياداعى ۇستازدارى ايتقالي جايىموۆ، كەنجەبەك كۇمىسبەكوۆ، تولەپبەرگەن ابدىراشيەۆ سىندى ونەر شەبەرلەرىن ءارقاشان ارداق تۇتادى. 2001 جىلدان بەرى ورال قالاسىندا تۇرادى، ءقازىر عاريفوللا قۇرمانعالييەۆ اتىنداعى باتىس قازاقستان وبلىستىق فيلارمونياسى داۋلەتكەرەي اتىنداعى قازاق حالىق اسپاپتارى وركەسترىنىڭ كوركەمدىك جەتەكشىسى جانە باس ديريجەرى بولىپ قىزمەت اتقارۋدا.

قازاق حاندىعىنىڭ 550 جىلدىعىنا ارنالعان «ايبىندى اقجايىقتان...» اتتى كونسەرتتە «كونگرەسس-حولل» سارايىنا جينالعان كورەرمەندەر قۇرمانعازى، داۋلەتكەرەي، الشەكەي، جانتورە جانە ماحامبەتتىڭ كۇيلەرىن تىڭداپ، رۋحاني قۋات الدى.

بۇل كۇنى ەركىن نۇرىمبەتوۆ استانا قالاسىنىڭ مەملەكەتتىك فيلارمونياسىنىڭ حالىق اسپاپتار وركەسترىنە ديريجەرلىك ەتىپ، ءوزى وركەسترگە ارناپ نوتاعا تۇسىرگەن كۇردەلى شىعارمالاردى تىڭداۋشىلار نازارىنا ۇسىندى. سونىمەن قاتار ءوزى شىعارعان تۋىندىلار مەن اندەر ورىندالدى.

وركەستر قۇرمانعازىنىڭ «قۋانىش»، داۋلەتكەرەيدىڭ «باپاس»، ماحامبەتتىڭ «قيىل قىرعىنى»، جانتورەنىڭ «شالقىما»، الشەكەيدىڭ «تەرىسقاقپاي» كۇيلەرىن ورىنداپ، كورەرمەندەردىڭ قوشەمەتىنە بولەندى.

بەلگىلى ونەر يەسى، قازاقستاننىڭ ەڭبەك سىڭىرگەن قايراتكەرى، پروفەسسور ايتقالي جايىموۆتىڭ ۇلى، ءوزى دە كومپوزيتور ارمان جايىمنىڭ «قوبىز بەن وركەسترگە ارنالعان كونسەرتىن» دە ەلوردالىقتار جىلى قابىل الدى. كۇردەلى دە تەرەڭ ماعىنالى بۇل تۋىندىنى رەسپۋبليكالىق كونكۋرستاردىڭ لاۋرەاتى سادجانا مىرزالييەۆا وركەستردىڭ سۇيەمەلدەۋىمەن قوبىزدا شەبەر ورىنداپ شىقتى. ءۇش بولىمنەن تۇراتىن بۇل كولەمدى شىعارما العاش رەت ورىندالۋىمەن دە ەرەكشەلەندى.

سونىمەن قاتار وركەستردىڭ قولداۋىمەن، جەكە دومبىرادا رەسپۋبليكالىق كونكۋرستاردىڭ لاۋرەاتى ەستاي ايتقۇلوۆ ورىنداعان ايتقالي جايىموۆتىڭ «وتپان تاۋ» مۋزىكالىق شىعارماسىن دا كورەرمەندەر ىستىق ىقىلاسپەن قابىل الدى. ماڭعىستاۋ ءوڭىرىنىڭ تاريحى مەن تابيعاتى، وزىندىك مىنەزى مەن ءسالت-داستۇرى، ونەرى مەن مادەنيەتى ارقاۋ بولعان تۋىندىنىڭ باعاسى دا جوعارى ەكەنى انىق.

ە.نۇرىمبەتوۆتىڭ «ورالىم - اسىل قالام» ءانىن ع.قۇرمانعالييەۆ اتىنداعى بقو فيلارمونياسىنىڭ ءسوليسى، رەسپۋبليكالىق م.تولەبايەۆ اتىنداعى ۆوكاليستەر كونكۋرسىنىڭ لاۋرەاتى ايبار حايىرحانوۆ ورىنداپ، استانالىقتاردىڭ قوشەمەتىنە بولەندى. بۇل ءاننىڭ ءسوزىن جازعان اسحات ماەميروۆ.

كەلەسى كەزەكتە زالعا جينالعان جۇرتشىلىق بالنۇر قىدىربەكتىڭ اسەرلى دە ويناقى ورىندالاتىن «قىرعىز كۇيىنە» شاتتانا قول سوقتى.

وسى كۇنى كورەرمەندەر ە.نۇرىمبەتوۆتىڭ «دارا تۇلعا - نۇرعيسا» اتتى مۋزىكالىق پوەماسىن دا وركەستردىڭ ورىنداۋىندا تىڭدادى. بۇل كەشتە ق ر ەڭبەك سىڭىرگەن ءارتىسى، پروفەسسور تۇرار الىپبايەۆ تا بىرنەشە كۇي تارتىپ بەردى.

كونسەرتتىڭ ورتا شەنىندە قازاقستاننىڭ ەڭبەك سىڭىرگەن قايراتكەرى حاتيموللا بەردىعالييەۆ ونەر سۇيەر قاۋىمنىڭ ۇلكەن قوشەمەتىمەن ساحناعا كوتەرىلدى. تانىمال ونەر يەسى اۋەلى دومبىراسىن قولىنا الىپ، ءمۇحيتتىڭ «كىشى ايدايىن» شىرقادى. ودان كەيىن وركەستردىڭ سۇيەمەلدەۋىمەن تۇياقبەردى شامەلوۆتىڭ نۇرعيسا تىلەندييەۆكە ارنالعان «نۇرعيسا اعاما ساعىنىش» اتتى ءانىن ورىنداپ بەردى. بۇل ءاننىڭ ءسوزىن جازعان بەلگىلى اقىن تۇمانباي مولداعالييەۆ بولاتىن.

ح.بەردىعالييەۆ كەلەسى كەزەكتە مۇقان تولەبايەۆتىڭ «ءبىرجان سارا» وپەراسىنان «ەستايدىڭ تەرمەسىن» جانە ساعيت سادىقوۆتىڭ «دوس ءازىلى» ءانىن شىرقادى.

ەركىن نۇرىمبەتوۆتىڭ شىعارماشىلىق كەشى وركەستردىڭ ورىنداۋىنداعى قۇرمانعازىنىڭ «سارىارقا» كۇيىمەن اياقتالدى.

«بۇعان دەيىن ەلورداعا وركەسترمەن كەلىپ ءجۇرمىز. الايدا، بۇل مەنىڭ جەكە شىعارماشىلىعىما بايلانىستى استانادا وتكىزىپ وتىرعان تۇڭعىش ۇلكەن كونسەرتىم. ۇلكەن اسەر الدىم. كوڭىلىمىز ءوسىپ، حالىقتىڭ شىنايى قوشەمەتىنە بولەندىك»،- دەدى ەركىن نۇرىمبەتوۆ.

دەرەككوز: قازاقپارات