"قازاقستان تەمىر جولى" ۇلتتىق كومپانياسى ءبىرقاتار اۋىل شارۋاشىلىعى تاۋارىن قىتايعا تاسىمالداۋعا تىيىم سالۋ تۋرالى بۇيرىقتى ۇزارتتى. قۇجاتتا بۇل شارا 1-10 قىركۇيەك ارالىعىندا ارەكەت ەتەتىنى ايتىلعان، دەپ حابارلايدى "APK News" اقپارات اگەنتتىگى. بۇعان التىنكول ستانساسىندا جۇك پويىزدارىنىڭ جينالىپ قالۋى سەبەپ بولدى
بۇيرىققا 2025 جىلعى 26 تامىزدا قول قويىلدى. قۇجاتتا تەمىرجول قۇرامدارىنان جۇك ءتۇسىرۋدىڭ جۇيەلى تۇردە كەشىگۋى جانە جۇڭگو تاراپىنىڭ اۋىل شارۋاشىلىعى ونىمدەرى (استىق داقىلدارى، بيداي، زىعىر، مايلى داقىلدار، ارپا، مال ازىعى، ۇن، قايتا وڭدەۋ ونىمدەرى) تيەلگەن جابىق ۆاگونداردى التىنكول ستانساسى ارقىلى قابىلداماۋىنا بايلانىستى ستانسادا جىلجىمالى قۇرامنىڭ جينالىپ قالعانى حابارلانعان.
"الدىن الا مالىمەت بويىنشا ستانسيادا استىق تيەلگەن 310-نان استام جابىق ۆاگون تۇر، ولاردىڭ كۇتۋ مەرزىمى جيىرما تاۋلىككە دەيىن بارادى"، - دەپ جازىلعان حابارلامادا.
وسىعان بايلانىستى 2025 جىلعى 1 قىركۇيەكتەن 10 قىركۇيەككە (قوسا العاندا) دەيىنگى كەزەڭدە التىنكول وتكىزۋ پۋنكتى ارقىلى جۇڭگو حالىق رەسپۋبليكاسىنا جونەلتىلەتىن بيداي، زىعىر، مايلى داقىلدار، ارپا، قۇراما جەم، ۇن، كەبەك، ۇن جانە باسقا دا استىق وڭدەۋ ونىمدەرى (جۇگەرىدەن باسقا) تيەلگەن جابىق ۆاگونداردى تاسىمالداۋعا قابىلداۋعا جانە قايتا باعىتتاۋعا تىيىم سالۋ تۋرالى شەشىم قابىلداندى.
بۇيرىقتا جاعداي تۇراقتالعان جانە تاسىمالداۋ شارتتارى جاقسارعان جاعدايدا اتالعان تىيىم الىنىپ تاستالاتىنى دا كورسەتىلگەن.
