باس اسكەري پروكۋراتۋرا استاناداعى ۇلتتىق ۇلاننىڭ 21 جاستاعى ساربازى قايسار سۇلتانوۆتىڭ ولىمىنە قاتىستى تەرگەۋ بارىسى تۋرالى حابارلادى. 

قايسار سۇلتانوۆ 2023 جىلى 9 قازانعا قاراعان ءتۇنى قايتىس بولدى. ول استاناداعى 6636 اسكەري بولىمىندە بورىشىن وتەگەن. مارقۇمنىڭ اناسى قايعىلى وقيعادان ءبىر كۇن بۇرىن ۇلىن كورگەنىن جانە كۇدىكتى ەشتەڭە بايقاماعانىن ايتادى.

قايعىلى وقيعادان كەيىن تەرگەۋ ورگاندارى قىلمىس قۇرامىن تاپپاي، ءىستى ءۇش رەت جاۋىپ تاستاعان. ەندى تەرگەۋ قىلمىستىق كودەكستىڭ 105-بابى ("ءوزىن-وزى ولتىرۋگە دەيىن جەتكىزۋ") بويىنشا قايتا باستالدى. الايدا قايساردىڭ اناسى ساۋلە تىلەۋبەرگەنوۆا ۇلى ولتىرىلگەنىنە، ال كىنالىلەر ءالى دە ۇلتتىق ۇلان قاتارىندا قىزمەت ەتىپ ءجۇرۋى مۇمكىن ەكەنىنە سەنىمدى.

باس اسكەري پروكۋراتۋرا رەداكسيانىڭ ساۋالىنا جاۋاپ رەتىندە ورتالىق وڭىرلىك اسكەري-تەرگەۋ باسقارماسى اسكەري قىزمەتشىنىڭ ءولىمى دەرەگى بويىنشا سوتالدى تەرگەۋ جۇرگىزىپ جاتقانىن حابارلادى.

"قازىرگى ۋاقىتتا جەدەل-تەرگەۋ ءىس-شارالار كەشەنى جۇرگىزىلىپ، سوت ساراپتاماسى تاعايىندالدى"، – دەدى ۆەدومستۆو وكىلدەرى.

پروكۋراتۋرا وزگە دەرەكتەردى تەرگەۋ قۇپياسىنا بايلانىستى (قپك-نىڭ 201-بابىنا سايكەس) جاريا ەتۋدەن باس تارتتى.

مارقۇمنىڭ اناسى ۇلى مۇنداي قادامعا بارمايتىنىن ايتادى. ول سوت-مەديسينالىق ساراپتامانىڭ ناتيجەلەرىنە سۇيەنىپ وتىر.

"ماماندار ءبىرىنشى وقتىڭ تومەننەن جوعارى اتىلعانىن، باس سۇيەگى مەن ماڭدايىنداعى جاراقاتتان سارباز مەرت بولعانىن انىقتادى. قورىتىندىعا سايكەس، ەكىنشى وق التى مينۋتتان كەيىن اتىلعان. ءبىراق ءبىرىنشى جاراقاتتان كەيىن قايساردىڭ سانالى تۇردە ەشقانداي ارەكەت جاساۋعا شاماسى كەلمەگەن"، - دەدى ول.

ادۆوكات ينگا يمانبايدىڭ ايتۋىنشا، ءىستى قايتا باستاعاننان كەيىنگى ءۇش اي ىشىندە تەرگەۋ العا جىلجىماعان.

مارقۇمنىڭ وتباسى ءىستى "كىسى ءولتىرۋ" بابىنا قايتا سارالاۋدى، بۇل جايتقا قاتىسى بارلاردىڭ ءبارىن جاۋاپقا تارتۋدى تالاپ ەتىپ وتىر.