“دەكلاراسيانىڭ مەرزىمى ءوتىپ كەتكەن“: قازاقستاندىقتارعا الاياقتىقتىڭ جاڭا ءتۇرى تۋرالى ەسكەرتىلدى. 

الاياقتار ازاماتتارعا قوڭىراۋ شالىپ، وزدەرىن مەملەكەتتىك ورگانداردىڭ قىزمەتكەرلەرى رەتىندە تانىستىرادى جانە سالىق دەكلاراسياسىن ۋاقىتىندا تاپسىرماعانىن ايتادى.

ولار ازاماتتاردىڭ شوتتارى بۇعاتتالاتىنىن ايتىپ، "ماسەلەنى شەشۋ" ءۇشىن ءۇش كۇن ىشىندە ارەكەت ەتۋ كەرەكتىگىن جەتكىزەدى. "جەكە تۇلعانى راستاۋ" ءۇشىن SMS ارقىلى كەلگەن كودتى ايتۋىن سۇرايدى. وسىلايشا الاياقتار ازاماتتاردىڭ بانك شوتتارىنا قول جەتكىزىپ، اقشالارىن ۇرلاپ الادى.

پوليسيا ەسكەرتۋى: مەملەكەتتىك ورگانداردىڭ قىزمەتكەرلەرى مۇنداي حابارلامالارمەن ازاماتتارعا قوڭىراۋ شالمايدى جانە ەشقاشان راستاۋ كودتارىن سۇرامايدى.

"ەشقاشان بوگدە ادامدارعا SMS-كودتاردى، پارولدەردى، بانك كارتالارىنىڭ دەرەكتەرىن جانە باسقا دا جەكە مالىمەتتەردى ايتپاڭىز. كۇدىكتى قوڭىراۋلار تۇسكەن جاعدايدا اڭگىمەنى دەرەۋ توقتاتىپ، 102 ءنومىرى ارقىلى پوليسياعا حابارلاسىڭىز"، - دەلىنگەن حابارلامادا.

بۇعان دەيىن قازاقستاندىقتار ونلاين-الاياقتاردىڭ قۇربانى بولىپ، ميللياردتاعان اقشاسىنان ايىرىلىپ جاتقانىن جازعان ەدىك. الاياقتار ۇنەمى جاڭا سحەمالار ويلاپ تابادى، ال ولاردىڭ تۇزاعىنا ينتەرنەتتى بەلسەندى پايدالانۋشىلار دا، ەگدە جاستاعى ادامدار دا ءتۇسىپ جاتىر.