وڭىرلىك كوممۋنيكاسيالار قىزمەتىنىڭ الاڭىندا الماتى قالاسى اكىمىنىڭ ورىنباسارى بەيبىت شاحانوۆ قالا تۇرعىندارىنىڭ سۇراعىنا جاۋاپ بەرىپ، الماتى زووباعىن جاڭعىرتۋ جوسپارى تۋرالى جان-جاقتى بايانداپ بەردى.
ونىڭ ايتۋىنشا، زووباق – بىرەگەي نىسان، ءارى وعان كەلىپ-كەتەتىندەر سانى دا ارتىپ بارادى. سوندىقتان قازىرگى قورشاۋلاردىڭ، اينالاداعى اۋماقتار مەن ينجەنەرلىك ينفراقۇرىلىمنىڭ جاعدايى ەداۋىر ەسكىرگەنىن، جۇرتقا ساپالى قىزمەت كورسەتۋگە مۇمكىندىك بەرمەيتىنىن ايتادى. قازىرگى قورشاۋلار جانۋارلاردى كۇتىپ-ۇستاۋدىڭ الەمدىك ستاندارتىنا دا ساي كەلمەيدى.
«الەمنىڭ بارلىق ەلىندە زووباقتاردى تابيعي ورتاعا ۇقسايتىنداي ەتىپ، جان-جانۋارلارعا بارىنشا جايلى جاعداي جاساپ جاتىر، ءبىز دە وسى باعىتتا جۇمىس ىستەۋگە بەت الدىق»، - دەيدى بەيبىت شاحانوۆ.
قايتا جاڭعىرتۋعا دايىندىقتىڭ نەگىزگى كەزەڭىنىڭ ءبىرى – ىرگەلەس جەر تەلىمدەرىن ساتىپ الۋ. ول - ينفراقۇرىلىمدى تولىق جاڭارتىپ، جانۋارلاردى ۇستاۋعا ارنالعان زامانعا ساي تابيعي ايماقتار قۇرىپ، اۆتوتۇراق اۋماعىن كەڭەيتۋ دەگەن ءسوز.
«جوبالىق-سمەتالىق قۇجاتتاما ازىرلەنىپ جاتقان كەزدە كليماتتىق جاعدايى ۇقساس ەلدەردىڭ زووپاركتەرىن جاڭعىرتۋ تاجىريبەسى ەسكەرىلۋدە. ۆولەرلەرگە قويىلاتىن تالاپتار جەتەكشى الەمدىك ساراپشىلاردىڭ قاتىسۋىمەن ازىرلەنگەن مودەرنيزاسيانىڭ ماستەر-جوسپارىندا بەلگىلەنگەن جانۋارلاردى كۇتىپ-ۇستاۋ ستاندارتتارىنا تولىق سايكەس كەلەدى. جوبالاۋعا ەۋروپا مەن رەسەيدەن كەلگەن زووارحيتەكتورلار قاتىسۋدا»، – دەپ اتاپ ءوتتى سپيكەر.
جوبا بويىنشا جۇمىس ءقازىر باستالىپ كەتتى. كەلەر جىلى جوبالاۋ-سمەتالىق قۇجاتتامانى ازىرلەۋ دا اياقتالىپ قالادى. ال 10 جەر تەلىمىن ساتىپ العاننان كەيىن قالا زووپاركتى اۋقىمدى تۇردە قايتا قۇرۋعا كىرىسەدى.
