Taraz memlekettik pedagogıkalyq ınstıtýtynda hımıalyq zerthanalar kesheni ashyldy. Paıdalanýǵa berilip otyrǵan 6 zerthanalyq kabınet zamanaýı quraldarmen jabdyqtalǵan, - dep habarlaıdy «Qamshy» portaly ınstıtýttyń baspasóz qyzmetine silteme jasap.

Saltanatty ashylý rásimine «Qazfosfat» kásipornynyń bas dırektory, «Qazaqstannyń Eńbek Eri» ataǵynyń ıegeri Muqash Eskendirov qatysyp, stýdentterge óziniń ómirlik tájirıbesimen bólisti. Óz kezeginde stýdentter de «Qazfosfat» syndy mekemede tájirıbeden ótip, jumys istegisi keletindigin jetkizdi.

– Búgingi ashylyp otyrǵan zerthana bizdiń jan-jaqty damýymyzǵa mol múmkindik beretin bolady. Qazirgi tańda bilimimizdi tek teorıalyq turǵyda ǵana emes, jańa jabdyq arqyly is júzinde shyńdaı alamyz. Jastarǵa kóńil bólip, bolashaqqa oń jol silteýge sep bolǵan basshylyqqa alǵysymyz zor, – deıdi atalǵan oqý ornynyń stýdenti Aısulý Bektasova.

Shara munan soń ««Eńbek – er atandyrady» taqyrybyndaǵy kezdesýge ulasty. Júzdesýdi Taraz memlekettik pedagogıkalyq ınstıtýtynyń rektory Darıa Qojamjarova júrgizip otyrdy.

– Ertede bir adam danyshpannan: «Dúnıede kim baqytty?» – dep suraǵan kórinedi. Ol oılanbastan: «Dúnıede kóp adamdy baqytqa bóleı bilgen adam baqytty»,– dep jaýap bergen eken. Ujymdaǵy talaı adamǵa baqyt kiltin ustatqan Sizdi baqytty jan desek, jarasyp keteri anyq. Sizdiń tirligińiz búginde árbir qazaq balasyna úlgi-ónege bolary sózsiz, – dedi Darıa Perneshqyzy.

Qazaqstannyń Eńbek Eriniń jastarmen júzdesýindegi negizgi áńgime aýany búgingi eńbek adamynyń bet-beınesi, maman daıarlaýdaǵy jańashyldyqtar, óziniń ómir jolynyń jarqyn belesteri týrasynda órbidi. Sonymen qatar, is-shara aıasynda «Qazfosfat» kásiporny men Taraz memlekettik pedagogıkalyq ınstıtýty arasynda birigip maman daıarlaý jóninde kelisim jasaldy. Dýaldy júıe arqyly iske asyrylatyn bul qadamnyń qos tarap úshin de tıimdiligi kóp. Óndiris oshaǵy mamandy qaıta daıarlap, jumys ornyna beıimdeýge ýaqyt ketirmeıdi ıakı oqý úrdisiniń basym bóligi kásiporynda ótedi. Joǵary oqý ornyndaǵy bilim alýshy jastar úshin ómirdegi óz ornyn erte tabýǵa múmkindik týady, jumysqa erte aralasyp, beıimdeledi.

– Kásiporyndarǵa jańadan oqý bitirip barǵan jas mamandardy iske úıretip, baýlýǵa kóp ýaqyt ketedi. Olardy kún saıyn jańaryp otyratyn tehnıkaǵa beıimdeý qajet. Bilesizder, qazir engizilip otyrǵan dýaldy oqytý júıesi jýyq arada óz nátıjesin beredi dep kútilýde. Al, bizge tájirıbe alý maqsatynda keletin jastardy keýdesinen keri ıtermeımiz. Sebebi, bolashaq – jastar qolynda, – dedi Muqash Zulqarnaıuly.

Jıyn barysynda M. Eskendirovke «Taraz memlekettik pedagogıkalyq ınstıtýtynyń Qurmetti profesory» ataǵy berildi. Qurmet belgisi retinde Eńbek Erine gúl shoqtary tabys etilip, án-jyrdan shashý shashyldy.