Búgin Astanada ótken Aýyl sharýashylyǵy mınıstrliginiń alqa májilisinde mınıstr Mamytbekov mundaı jıyndardy ótkizý keńestik dáýirden qalǵan eski dástúr ekendigin aıtyp, onyń tıimdiligine kúmán keltirdi.

Mınıstrliktiń jıynyna Premer-mınıstrdiń birinshi orynbasary Baqytjan Saǵyntaev qatysqan edi.

«Tutastaı alǵanda ótkizilip otyrǵan formattaǵy mundaı alqa májilisteri keńestik zamannan kele jatqan kónergen dástúr. Mundaı ýaqyt ótkizýlerden úlken nátıje kórip otyrǵam joq. Biz túrli formatta onsyz da kezdesip júrmiz. Jaqynda ǵana Fermerler odaǵynyń bas qosýy boldy. Onda  mańyzdy máseleler kóterildi. Biz tikeleı taýar óndirýshilermen kezdestik. Al, myna jerde biz, birińǵaı sheneýnikter, ózara jınalyp alyp óz-ózimizge barlyǵymyz biletin sıfrlar týraly esep berip otyrmyz. Biraq bizdiń jumystyń formaty osyndaı. Ony ózgertýge qazir bizdiń shamamyz kelmeıdi», - deıdi Asyljan Mamytbekov myrza.

Jıynda Asyljandy naqty máselelerdiń kóterilmegeni ashyndyrsa kerek. Mınıstr Úkimet jıyndaryna qaraǵanda bıznes-qaýymdastyqtardyń bas qosýlary naqty máselelerdi sheshetinin tilge tıek etti.

«Al, qazir ormanshylar fıtosanıtarıa týraly, al, malshylar ormanshylar týraly áńgime tyńdap otyr. Iaǵnı, biz qandaı da bir tapsyrmalardy oryndap, qandaı da bir jańalyqtar engizý ornyna bir-birimizdiń qyrýar ýaqytymyzdy bosqa alyp otyrmyz. Máseleler jetkilikti, biz alqa májilisin aqparattyq turǵyda paıdalanǵymyz keldi. Iaǵnı, zańǵa engizilgen barlyq ózgeristerdi, saıasattaǵy ózgeristerdi túgel aıttyq», - degen ol Premer-mınıstrdiń birinshi orynbasaryna qarata.

Saǵyntaev qatysqan jıynda Qazaqstan astyǵyn Qytaıǵa eksporttaý, halal ındýstrıany damytý, aýyl sharýashylyǵy salasyndaǵy sýbsıdıalaý máseleleri sóz bolǵan. Vıse-premer Qytaıdyń Qazaqstan astyǵyna degen suranysyn tıimdi paıdalaný týraly aıta kele mınıstrlik jumysyndaǵy kemshilikterge de nazar aýdarǵan bolatyn.

«Bizde tek bir túıtkil ǵana bar. Ol - bizdiń memlekettik organdardyń úılesimsiz jumysy. Biz osy týraly aıtqanda, tehnıkalyq retteý komıteti bul isti aýyl sharýashylyq mınıstrligine ysyrdy, mınıstrlik bolsa, komıtettiń jumysy dep at tonyn ala qashty. Árbir memlekettik organ óz mindettemelerinen qashýda. Nátıjesinde - «baıaǵy jartas, sol jartas». Jumys ornynan qozǵalǵan joq», - dedi ol.

Mamytbekov myrza vıse-premerdiń osy sózine shamdandy ma, Májilis saılaýynan keıin bolatyn Úkimettiń jańarýyna baılanysty sebebi boldy ma, mınıstrlik qyzmetkerleriniń aldynda, Premerdiń orynbasarynyń kózinshe batyl baıandama jasady. Bildeı Úkimet basshysynyń orynbasary jetekshilik jasap otyrǵan jıyndy «ýaqytty bosqa ótkizý» dep atady.

Alaıda, buǵan Saǵyntaevtyń da saǵy syna qoımaǵan sıaqty. Mınıstrlik ujymyna saılaý týraly anekdot aıtyp bergen.

«Jaqynda Ázirbaıjan men Grýzıada issaparda boldym. Ázirbaıjannyń premeri sol kezde jaqsy bir anekdot aıtyp berdi.

Elde saılaý ótipti. Bir partıa jeńiske jetipti. Partıa serkesi basqarý, ekonomıka salasynda jumys istemegen jas jigit eken. Saılaý bitken soń keńesshilerin jınap alyp, surapty deıdi.

-         Bizde munaı bar ma?

-         Joq.

-         Gaz she?

-         Joq.

-         Altyn..

-         Joq.

-         Mys she?

-         Ol da joq.

-         Orman bar ma?

-         Orman da joq.

-        Qoı, onda jumys isteıik, - depti sonda. Jaman anekdot emes», - dep agrarlyq salanyń qulaǵyn ustaǵandardyń kóńilin kóterýge tyrysqan.