Almaty ýnıversıtetiniń stýdentteri qoǵam qaıratkeri, halyqaralyq «Qazaq tili» qoǵamynyń prezıdenti, akademık Ómirzaq Aıtbaevpen kezdesti. Syr-suhbat «Qazaq ǵylymy: keshe, búgin, erteń» degen taqyrypta ótti. Sonymen qatar, akademıktiń ónegeli ómiri men shyǵarmashylyǵy, ǵylymı eńbekteri men qaıratkerlik qyzmeti jaıly búkpesiz áńgimeler aıtyldy, - dep habarlaıdy ýnıversıtettiń baspasóz qyzmetinen.
Alǵashqy sóz kezdesýdi uıymdastyrýshy ýnıversıtetimizdiń dosenti, fılologıa ǵylymynyń kandıdaty Rahmanova Nurjanat Maldybaıqyzyna berildi. Rýhanı ustazy jaıly tereń de maǵynaly estelik aıtyp, ómirderekterinen kóptegen mysaldar keltire otyryp, ǵylymı zertteý jumystaryndaǵy erekshe atap ótetin tórt baǵytqa toqtaldy.
- Onyń eń birinshisi, frazeologıalyq tirkesterdiń qyr-syryn ashýǵa, frazeologızmderdiń qazaq-orys tilderindegi bolmysyn qarastyrý arqyly aýdarma máselesine baılanysty ǵylymı qorytyndylar jasady. Ekinshi, termınolog ǵalym retinde qazaq termınologıasyn qoǵamdyq ǵylymdar salalary boıynsha túbegeıli zerttep, onyń damýy men qalyptasý sheńberin anyqtady. Úshinshi, Ómirzaq Aıtbaev qazaq lıngvısıkasynyń stılısıka, til mádenıeti, ádebı til tárizdi salalary boıynsha ózindik pikir órbitip júrgen ǵalym. Tórtinshi, qazaq tiliniń memlekettik til retinde mártebelený jolyndaǵy izdenisteri men kúresterin óz aldyna bir sala, baǵyt retinde qaraǵanymyz jón. Iaǵnı, ol qazaq tilin memlekettik til retinde qalyptastyrýshy mamannyń biri,-dedi Nurjanat Maldybaıqyzy óz baıandamasynda.
Odan ármen senarı boıynsha qazaq tili men ádebıeti mamandyǵynyń stýdentteri ǵalymnyń jazǵan óleńderi men til týraly tolǵanystarynan úzindi oqydy. 2 kýrs stýdentteri Aıtaqyn Márlen men Álip Nurahmet arnaý óleńderin jatqa aıtty. Kezek syr-suhbatqa kóshti. Stýdentter kókeılerinde júrgen suraqtaryn qoısa, akademık ashyla sóılep, búgingi ǵylym men bilimniń, tildiń jaı-kúıi jaıly óz pikirin bildirdi.
Qyrǵyz kınosynyń qaıtalanbas týyndysy sanalatyn «Ystyqkóldiń alqyzyl gúlderinde» Birjan saldyń «Temirtas» ánin oryndaǵan Ómirzaq Aıtbaev ekendigin bireý bilse, bireý bilmes. Kınoǵa daýys berýdiń tarıhy jaıly da keremet syr shertildi. Kezdesýdiń eń qyzyqty sáti stýdentter qonaǵymyzdan qonaq káde surady. Segiz qyrly, bir syrly Ómirzaq Aıtbaev jastardyń ótinishi boıynsha Birjan saldyń «Temirtas» ánin yqylaspen oryndap berdi.
Kezdesýdiń qorytyndy sátinde ýnıversıtettiń tárbıe isi jónindegi prorektory Amanǵalıeva Symbat Tlegenqyzy:
- Keńes úkimeti tusynda orystandyrý saıasatynyń nátıjesinde qazaq mektepteri men balabaqshalary sanaýly bolatyn. Jalǵyz qazaqsha bilim beretin №12 mektep bolǵanyn bárimiz jaqsy bilemiz. Sol kezde birneshe qazaq mektebi pen balabaqshasynyń ashylýyna Ómirzaq Aıtbaevtyń tıgizgen úlesi zor. Til janashyry retinde jasaǵan eńbekterińizdi osy otyrǵan jastar eshqashan umytpasy anyq. Osy jyly seksenniń seńgirine kelip otyrsyz. Sizdiń denińizge saýlyq, otbasyńyzǵa amandyq tileımin. Bizdiń oqý ordamyzǵa kelip, stýdenttermen syr-suhbat júrgizýge keliskenińizge dán rızamyn,-dep atap ótti.
Adam balasynyń qalyptasýyna, ózindik sana seziminiń ornyǵýyna ushqan uıa, ósken orta aıryqsha áser eteri ras. Akademık qorytyndy sózinde: «Men aqyl-oı men bilim, bilik degen uǵymdardy kitapty kóp oqý arqyly sezingendeımin»,- dedi. Onyń osy oqýǵa degen qushtarlyǵy ómir ózeninde óz jalǵasyn taýyp, QR Ǵylymdar Akademıasynyń Til bilimi ınstıtýtynda kishi ǵylymı qyzmetkerden akademık dárejege deıin jetkizdi. Munyń bári tabandy eńbek pen ǵylymǵa degen súıispenshiliktiń nátıjesinde bolaryn stýdentter kezdesý barysynda uǵyndy.
