Búgin Almaty qalasy boıynsha jemqorlyqqa qarsy qyzmet ókilderi tergegen Áset Mataev «Azattyqqa» suhbat berdi, - dep habarlaıdy «Qamshy» portaly.

Tergeýden bosaǵan Áset Mataev ákesiniń áli Almaty qalasy boıynsha Jemqorlyqqa qarsy qyzmet mekemesinde otyrǵanyn aıtyp, tergeý barysy týraly baıandap bergen.

«Bizdi tańerteń Almaty qalasy boıynsha jemqorlyqqa qarsy qyzmet bastyǵyna alyp bardy. Onda Shattyq Óteevten basqa (Almaty qalasy boıynsha jemqorlyqqa qarsy qyzmet bastyǵy – red.) Astanadan kelgen Jemqorlyqqa qarsy is-qımyl jónindegi Ulttyq búro jedel departamenti bastyǵynyń orynbasary boldy. Ol bizge taǵy bir qylmystyq is qozǵaı alatyndyqtaryn, baspasóz máslıhatyn ótkizsek, keıin sheginý qıyn bolatynyn eskertip, «Oılanyńdar. Biz isti shýsyz jaba alamyz», - dedi. Biraq, ákem olarǵa «Olaı bolsa, bul isti ashýdyń qajeti qansha edi?», - dep narazylyq bildirdi. Ákem Astanada bolǵanda odan saılaý naýqanynda baspasóz máslıhatyn ótkizbeý týraly suraǵan. Biz bir jarym aı boıy, qańtardyń basynan beri úndemedik», - degen Áset Mataev qozǵalǵan istiń negizinen Investısıa jáne damý mınıstrliginiń sheneýnikterine qatysty bastalǵanyn aıtyp otyr.

Esterińizge salsaq, búgin tańerteń «Ulttyq baspasóz klýby» QB-niń jetekshisi, Qazaqstan Jýrnalıser odaǵynyń tóraǵasy Seıitqazy Mataev pen onyń uly, «QazTAG» halyqaralyq aqparat agenttiginiń bas dırektoryn Almaty qalasy boıynsha jemqorlyqqa qarsy qyzmet ókilderi tergeýge alyp ketken bolatyn. Oǵan senip tapsyrylǵan múlikti jymqyrdy jáne salyq tóleýden jaltardy degen aıyp taǵylyp otyr.