OQO Ordabasy aýdanynda urlanyp, keshe tabylǵan Muhammed Qamshybek Shymkenttegi aqparat quraldaryna suhbat berdi, - dep habarlaıdy «Qamshy» portaly Tengrinews.kz –ke silteme jasap.

Bala ózin urlaǵan áıeldiń múltfılmder kórsetip, ýaqytynda tamaqtandyryp, tipti dúkennen shyryn satyp alyp bergenin de aıtty. Bolǵan jaǵdaıdan shoshynyp qalǵan búldirshin qysqa ǵana sóılegen.

Balanyń aıtýynsha, ózin urlap ketken Baljan esimdi áıel ony renjitpegen. Muhamed ózin urlaǵan áıeldiń úıinde taǵy bir qyz balanyń bolǵanyn jetkizdi. Áıel adam balany dárihanaǵa baryp qaıtýǵa shyqyryp, úıine alyp ketken. Ata-anasyn izdegen balaǵa áıel olardyń jaqyn arada keletinin aıtyp jaýap bergen. "Men anam men ákemdi qatty saǵyndym", - dedi Muhammed Qamshybek.

Bala únemi anasyn qushaqtap otyrdy, ol tamaq ishkisi keletinin aıtty. Balanyń anasy bolsa osy ýaqyt boıy qatty alańdaǵanyn, qatty qoryqqanyn jetkizdi. "Qazir men baqyttymyn, bárine alǵys aıtamyn. Qazaqstandyqtarǵa balaǵa abaı bolýǵa keńes beremin", - dedi balanyń anasy.

Esterińizge salsaq, joǵalyp ketken Muhammed 23 aqpanda Arystan tabyldy. Onyń qasynda 59 jastaǵy áıeldiń bolǵany anyqtaldy. Onyń túr-kelbeti fotorobotpen sáıkes keledi eken. Oblystyq İİD áıeldiń ustalyp, onyń ústinen "Adam urlaý" babyna sáıkes qylmystyq is qozǵalǵanyn aıtty.