Ońtústik Qazaqstan oblysy Ordabasy aýdany Amangeldi aýylynda urlanyp, keshe Arys qalasynda tabylǵan Muhammed Qamshybek týraly polısıaǵa habar berip, ony qutqarýǵa kómektesken qyzdyń basyna qaýip tónýde. Bul týraly Feısbýk áleýmettik jelisinde Bıbigúl Dáýletbek habarlady.

«Shymkenttegi balaqaıdyń tabylǵanyna Qazaqstan halqy qýanýda. Al, osy balany taýyp berýge sebepshi bolǵan qyzdyń jaǵdaıy qandaı kúıde ekenin men ǵana bilem. Qazirde ıneniń ushynda otyr. Dalaǵa emin-erkin shyǵýdan qaldy.

Qaısar qyz keshe 6 jasar Muhammedtiń joǵalǵanyn Instagramǵa jazǵanymda, birden maǵan habarlasqan edi.

-Bıbigúl apaı, men bul balany kórdim. Hıdjabtaǵy áıel emes, basqa 50-55 jastaǵy áıel men janynda 35- 40 jas shamasynda er kisi boldy, -dep aıtqan. Men shuǵyl túrde polısıa bólimine habarlasýyn aıttym. Ol qyz qoryqsa da, İİB-ne habarlasty(mende aýdıozapıs ta bar). Keshe túnde er kisiniń fotorobotyn jasaýǵa taǵy álgi qyzdy úıinen alyp ketti. Túngi 1-30-da. Opermen sóıleskenimde, qyzdyń ómirine qaýip tónbeıtindeı jaǵdaı jasaýyn ótindim.

Alaıda, ıá, alaıda, baıǵus qyz búgin úıinen shyǵa almaı otyr. Dúkenge baryp nan satyp alýǵa qorqyp otyr. Sebebi, balany urlaǵan erkek bostandyqta júr. Dostarymmen sóılesip, 102 bólimine habarlasýyn aıttym. Nege qyzdyń jaǵdaıyn jasamaıdy?! Marapattar bermeı-aq qoısyn. Biraq, bul qyz da adam balasy emes pe?! Sonda balany taýyp berýge atsalysqan qyzdy paıdalandy da, ári qaraıǵy ómirine jaýap bermeımiz degen nemquraılyq pa bul?!

Jaýap berińizdershi, osynda eger OQO İİB-niń qyzmetkerleri bolsa?!

Qyzdyń esimi qupıa túrde ustalý kerek. Biraq bostandyqta júrgen erkek qyzdyń turyp jatqan páterin biledi. Másele sonda bolyp tur», - deıdi Bıbigúl Dáýletbek.