Qazaqstan Respýblıkasynyń Qorǵanys mınıstri Imanǵalı Tasmaǵambetov «Shyǵys» Óńirlik qolbasshylyǵy, «Shyǵys» synaq alaǵynda ótip jatqan «Aıbalta-2016» jedel-taktıkalyq komandalyq-shtabtyq oqý-jattyǵýyna qatysty. Atalǵan jerge birneshe kún boıy QR Qarýly Kúshteriniń barlyq óńirlik qolbasshylyǵynyń jaýyngerleri tartylǵan, - dep habarlaıdy «Qamshy» portaly mınıstrliktiń baspasóz qyzmetine silteme jasap.

Dalalyq jaǵdaıda jattyǵý sharalaryn ótkizý úshin áskerlerdi biriktirilgen tásilmen 2 shaqyrymnan 4 shaqyrym qashyqtyqqa deıin jetetin jaýyngerler múldem beıtanys aımaqqa tartyldy. Sondaı-aq, «Úsharal» jedel áýejaıynda jaýyngerlik toptar jasaqtalyp, atalǵan Óńirlik qolbasshylyǵy «Shyǵys» synaq alańyna shoǵyrlandy.

Bólimsheniń tájirıbelik is-qımyly barysynda tosqaýyl-beketterde oqshaýlaýshy-buǵattaıtyn sharalar ıgerilip, shabýyldaý áreketteri júrgizildi. «Aıbalta-2016» oqý-jattyǵýynyń ereksheligi qystyń kúrdeli jaǵdaıynda barlyq bólimder men bólimshelerdiń tolyq qatysýymen jaýyngerlerdiń dalalyq aımaqta jumys jasaý daǵdysyn kúsheıtý bolyp tabylady.

Biryńǵaı jospar boıynsha jalpyáskerlik bólimshelerdiń arnaıy tapsyrmalary zerdelendi. Sonymen qatar, Mı-8, Mı-17, Mıg-27, Sý-30, Sý-27, Sý-25 ushaqtaryna barlaýshy-soqqy berýshi áreketter júrgizilip, áýe desantshylaryn túsirý jáne de áskerıler shańǵyda ózine belgisiz aımaqta jaýyngerlik tapsyrmalardy oryndaý úshin bólimshelerdi alǵa tartý qımyldary ótkizildi.

«Shılka» atty zenıttik qondyrǵy 100 m-den 1500 m-ge deıingi bıiktikte ushý jyldamdyǵy sekýndyna 450 metrge jetetin áýe maqsatyndaǵy atysty qamtamasyz etti.

Qazirgi zamanǵa saı bul kúnde jaýyngerlik is-qımyldardy júrgizý úshin oǵan qatysýshy áskerler únemi barlaý jumystaryn júrgizip, qarý-jaraq pen áskerı tehnıkany, jasyryný men qorǵaný quraldaryn sheber qoldana bilýi kerek. Bul jaýyngerlerden joǵary belsendilik pen uıymdastyrýshylyqty, rýh pen fızıkalyq kúsh jáne tártip pen aýyzbirshilikti talap etedi. Jattyǵý kezinde quramnyń 3000-nan astam áskerı qyzmetshisi, 900-ǵa jýyq áskerı jáne ózge de tehnıka birligi, 20 birlik shabyldaýshy áýekemesi jáne 12 birlik áskerı ushaq jumyldyryldy.

Odan bólek, áskerı qyzmetshiler barlyq bólimshelerdi belgilengen aýdandarǵa is-júzinde shyǵaryp, jedel tapsyrma aıasynda memlekettik shekarany kúzetýdi kúsheıtý boıynsha oqytý máselelerin pysyqtady.

Buryn sońdy bolmaǵan iri oqý-jattyǵýǵa aýa-raıynyń qolaısyzdyǵyna, qystyń qytymyrlyǵyna qaramastan tabandylyq pen tózimdilik tanyta bilgen barlyǵy 5 myńǵa jýyq áskerı qyzmetshi jumyldyrylǵanyn esterińizge sala keteıik. Osy kezeń aralyǵynda barlyǵy 1 500-den asa birlik qarý-jaraq pen áskerı tehnıka jáne shamamen 30 birlik áýe tehnıka tartylyp, is-qımyldardyń rettiligin jáne jattyǵýdyń túpki oıyn júzege asyrýy jetildirildi.

Eń iri jattyǵý qımyldaryna óńirlik qolbasshylyq basqarmasy organdary men Aeroutqyr áskerleri, Áskerı áýe kúshteriniń, aımaqtyq qorǵanys jáne brıgada basqarmasynyń jedel toptary, Ulttyq Qaýipsizdik komıtetiniń shekara qyzmetiniń ókilderi jáne de İİM ulttyq ulandar tartyldy.

«Aıbalta-2016» eń iri oqý-jattyǵýy tuńǵysh ret urys kezeńine barynsha jaqyndatylǵan jaǵdaıda ótkizilgenin aıta ketý kerek.