«Azamattarǵa arnalǵan úkimet» memlekettik korporasıasy kórsetiletin memlekettik qyzmetterdiń biryńǵaı provaıderi bolady, - dep habarlaıdy «Qamshy» portaly Indýstrıa jáne damý mınıstrligi Aqparat, aqparattandyrý jáne baılanys komıtetiniń baspasóz qyzmetine silteme jasap.

Korporasıa «Jer kadastrynyń ǵylymı-óndiristik ortalyǵy» RMK, «Jyljymaıtyn múlik ortalyǵy» RMK, «Zeınetaqy tóleý jónindegi memlekettik ortalyǵy», «Halyqqa qyzmet kórsetý ortalyqtary» RMQK-nyń qaıta uıymdastyrylý jolymen qurylatyn bolady. Korporasıany qurýǵa jaýapty ýákiletti organ QR Investısıalar jáne damý mınıstrligi (budan ári – QR IDM) bolyp aıqyndaldy.

Memlekettik qyzmetterdiń biryńǵaı provaıderi bolatyn «Azamattarǵa arnalǵan úkimet» memlekettik korporasıasy» komersıalyq emes aksıonerlik qoǵamyn qurý týraly» úkimettiń qaýlysyna 2016 jylǵy  29 qańtarda qol qoıyldy. Aǵymdaǵy jyldyń 1 qańtarynan bastap QR IDM zańnamada belgilengen tártippen qajetti is-sharalar júrgizýdi jáne korporasıany qurý rásimderin bastaıdy.

Múddeli ýákiletti organdar korporasıanyń qyzmetin jáne memlekettik qyzmetterdi usyný tártibin reglamentteıtin 140 astam zańǵa táýeldi normatıvtik-quqyqtyq aktini ázirledi jáne olar memlekettik tirkeýden ótýde.

Biriktiriletin kásiporyndardyń barlyq qyzmetkerleri óz jumys oryndaryn saqtap qalady. Korporasıa kórsetetin qyzmetter sanynyń artýyna baılanysty qazirgi ýaqytta korporasıanyń quramyna kirgen barlyq kásiporyndardyń front-ofısteri qyzmetkerlerin oqytý júrgizilýde.

Sol sıaqty, mınıstrlik ishki qujattamany, korporasıanyń damý josparlaryn ázirleýdi, ınfraqurylymdy taldaý men ońtaılandyrýdy, túgendeýdi qamtıtyn uıymdastyrýshylyq jumystar men basqa da is-sharalar júrgizýde.

Qoldanystaǵy zańnama talaptaryna sáıkes korporasıany qurý jónindegi barlyq rásimder aıaqtalǵansha deıin  «Jer kadastrynyń ǵylymı-óndiristik ortalyǵy» RMK, «Jyljymaıtyn múlik ortalyǵy» RMK, «Zeınetaqy tóleý jónindegi memlekettik ortalyǵy»,  «Halyqqa qyzmet kórsetý ortalyqtary» RMQK óz qyzmetterin burynǵy rejımde kórsetetin bolady.