Aıtysker aqyn Aspanbek Shuǵataevqa Pavlodar oblysynyń basshysy Q. Bozymbaev páter bermek bolǵanda qarsy shyqqandar da tabylypty, - dep jazady aitysker.com saıty oinet.kz – ke silteme jasap.

Ótken jyly birneshe aıtysta bas júlde utyp, artynsha «Altyn dombyrany» qanjyǵalaǵan kerekýlik aqyn Aspanbek Shuǵataevqa Pavlodar oblysynyń bıligi páter syılapty. Ony aqynnyń myna óleńderin negizge alyp aqparat kózderi jazdy.

Baıbek bergen kólikti júrgizgen ek,
Bozymbaev bir úıge kirgizgen ed.
Endi osy úıde turatyn sáýle shashyp,
Aspanǵa aıdaı sulý bir qyz kerek!

Ras ótirigine kóz jetkizý úshin Aspanbektiń ózimen habarlasqanymyzda ol páterdiń berilgenin jasyrmady. Áıtse de, aqynǵa baspanany BAQ ókilderin «shýlatpaı» bergeni tań qaldyryp otyr. Álde shynymen de kúndesterdiń kózine kúıik bolmasyn dedi me? Olaı deıtinimiz, ótken jyldyń sońynda Pavlodar oblysyndaǵy bir top aqyn jazýshylarǵa grant tapsyrý kezinde aımaq basshysy osy máseleni qozǵady. Ol óziniń aqyn Aspanbek Shuǵataevty jeke qabyldap tanysqanyn aıtty. Jáne aldaǵy ýaqytta oǵan oblys atynan páter berý máselesi qaralyp jatqanyn aıtqan. Tek sol syılyqqa keıbir zıaly qarsy bolyp jatqanyn da jasyrmady.

— Aspanbekke páter berý týraly sóz shyqqanda qarsy bolǵandar boldy. «Ol jap-jas bolyp qandaı eńbek sińire qoıypty. Talaı jyldan beri biz ala almaı júrgende?», degen sóz jetti. Sony aıtqan adam da osy jerde otyr, kózine shuqymaı-aq qoıaıyn,— degen edi Q. Bozymbaev. Mine, osy bir kórseqyzarlyq aqyndy ashyq áspetteýge kedergi bolǵan sıaqty. Aspanbekke baspanany oblys ákiminiń ótinish jasaýymen jomart jandar alyp beripti.  Bálkim, ol kásipkerler kózge túskileri kelmegen shyǵar.

Jalpy, «Altyn dombyra» utyp aıdy aspanǵa shyǵarǵan Aspanbekti dáripteý óziniń týǵan óńirinde kem túsip jatyr. Mektepter men kolejderde jastarmen kezdesýler ótkizip, onyń jetistikterin úlgi etse aqyndyq ónerge qulshynys bildiretin jastar da kóbeıer edi. Pavlodar oblystyq mádenıet, muraǵattar jáne qujattama basqarmasynyń basshysy Aınur Sársenbaeva, bul máseleni oılastyramyz dep sóz berdi, túneý kúni. Jalyndy jasqa kúndestik tanytqansha jiger bergen durys emes pe?!