OQO-da 6 jasar Muhammed Qamshybekti urlaǵan áıeldiń kúıeýi onyń keıbir áreketterinen ózi qorqatynyn aıtqan. Asan Oraqbaev áıeli ózin de dýalap alǵan otyr. Bul týraly «Qamshy» portaly TVK-ǵa silteme jasap habarlaıdy.

Onyń aıtýynsha, úıinde bóten balanyń júrgenin kórgende ne isterin bilmegen. Alaıda, áıeline qarsy eshteńe aıta almaǵan.

«Men odan balanyń kim ekenin suraǵanda, ol jıeniniń balasy ekenin aıtty. Men odan «Jıeniń Kentaý qalasynda turady emes pe?» desem, ol bul balany ózi taýyp alǵanyn, meniń aralaspaý kerektigimdi aıtty. Biz osy úshin urysyp ta qaldyq», – deıdi Asan Oraqbaev.

Týystary 60 jastaǵy Baljandy sıqyrshy dep ataıdy eken. Olardyń aıtýynsha, ájeıdiń adamdy dýalap alý qasıeti bar kórinedi.

«Bul áıel kózbaılaý qasıetine ıe. Siz onyń janynda tursańyz boldy, ol sizdiń senimińizge kirip, aldap ketýi múmkin. Baljan úıinde bir kún ǵana bolyp, sosyn birneshe aılap joq bolyp ketedi», – deıdi jezdesi Aman Oraqbaev.

Týystarynyń biri búldirshinniń izdeýdegi bala ekenin bilip, aıtqan da eken. Týystarynyń aıtýynsha, ájeıdiń kúıeýi densaýlyǵyna baılanysty aýyratyn bolǵan.

«10 jyldan beri Baljan esh jerde jumys istemeıdi. Jumysynda qysqartýǵa ushyrap, sodan beri úıinde otyr. Osydan keıin kúıeýiniń densaýlyǵy syr berip, aýyra bastady. Tipti, esinen adasa bastady. Soǵan qaraǵanda, áıeli ony dýalap tastaǵan sekildi», – deıdi Asannyń inisi Juman Oraqbaev.

Jaqynda belgili bolǵandaı, balany urlaǵan kúdikti áıel 2 aıǵa qamaýǵa alyndy. QR QK «Adam urlaý» baby boıynsha tergeý jumystary júrip jatyr. 60 jastaǵy zeınetker áıelge 12 jylǵa bas bostandyǵynan aıyrylý qaýpi tónip tur.

Buǵan deıin 20 aqpan kúni Muhamedtiń joǵalyp ketkenin, keıinnen balanyń tabylǵanyn habarlaǵan edik.

Polıseılerdiń aıtýynsha, ájeı budan buryn da 3 jastaǵy qyzdy urlap ketip, ony 10 kúnnen soń qaıtarǵan.