Qyzylordalyq polıseıler 1 táýlik boıy iz-tússiz joǵalyp ketken 3 jasar sábıdi izdep tapty, - dep habarlaıdy «Qamshy» portaly sn.kz-ke siltese jasap.

Oqıǵa 29 aqpan kúni oryn alǵan. Balasyn joǵaltqan ata-ana ishki ister departamentine keshki saǵat 20:30-dar shamasynda habarlasypty. Munan keıin jol-patrýldik polısıa qyzmetkerleri, ýchaskelik polıseıler jáne Tótenshe jaǵdaılar departamentiniń mamandary birlese izdestirý sharalaryn júrgizgen.

Birneshe saǵatqa sozylǵan izdeý sharalary barysynda sol aýmaqtaǵy kóp qabatty turǵyn úılerdiń ójireleri, podezderi, aıaqtalmaǵan qurylys nysandary, saıajaı aýmaǵyndaǵy dalalyq eldimekender tekserilip, kórgen-bilgen adamdardan jaýaptar alyndy. Atalǵan faktige sebep bolarlyq jaıttar, barlyq boljamdar jan-jaqty qaraldy. İzdeý sharalarynyń nátıjesinde, 3 jastaǵy búldirshin Tasbóget kenti, PMK-19 saıajaıynyń batys jaǵynan 4 shaqyrym qashyqtyqtaǵy jyńǵyldar arasynda uıyqtap jatqan jerinen tabylǵan.

Sondaı-aq, dál osy kúni 8 synypta oqıtyn jasóspirim qyzdyń joǵalyp ketý faktisi de tirkeldi. Ol keshki 21:30 shamasynda Tasbóget kentindegi ájesiniń úıine ketip, dittegen jerine barmaǵan jáne úıine de oralmaǵan. Qyzdyń anasy polıseılerge túngi 01:30 shamasynda habar berip, dereý izdeý sharalary júrgizildi.

Tártip saqshylary joǵalǵan jetkinshektiń qurby-qurdastarynan túgel surastyryp, túsiniktemeler alǵan. Nátıjesinde tańǵa jaqyn oqýshy qyz aman-esen tabyldy.

Joǵalǵan eki balanyń da jaǵdaılary jaqsy, densaýlyqtaryna tónip turǵan qaýip joq.