Jazýshy, qazaqy salt-dástúrlerdi nasıhattaýshy Zeınep Ahmetova   eldi kúldiremin dep talaı nárseni búldirip júrgen ártis erkekterdi qatań synǵa aldy, - dep habarlaıdy «Qamshy» portaly korrespondent.kz-ke silteme jasap.

«Aıta-aıta sharshadym, biraq áli aıtyp júrmin. Teledıdardy burap qalsam, jańaǵy "Shanshardyń" kórinisi bolyp jatyr. Bir kempir sóılep tur, onyń ózi erkek. Baıqaısyzdar ma, bizdiń qazaqtyń jigitteri qatyn bolýǵa áýes bolyp aldy qazir.

İshterinde birdeńe túrtkilep turady. Solardyń bar ǵoı bir bálesi bar. Áıtpese dardaı er azamattar nemenege sonsha áıel bolýǵa tyrysady? Basyna oramal salyp, ústine kóılek kıip. Oıbaı-aý, sonda áıeldiń rólin oınaıtyn qyz-kelinshekter quryp qaldy ma? Tolyp jatyr. Biraq ta úp-úlken er azamattar áıel bolýǵa qumar bolady da turady. Yrbyńdaıdy da turady, yrbyńdaıdy da turady. Sony keremet kelistirip te jatqan joq» dep ashyndy Baýyrjan Momyshulynyń kelini Z.Ahmetova. Sondaı-aq, qazaq salt-dástúrleriniń janashyry álgi teatr kórinisi ashýyna tıgenin jetkizdi. Aıtýynsha, qoıylymda úsh kelin qaıyn atasymen birge sahnaǵa shapqylap shyǵyp, onyń biri úlken kisini moınyna mingizip alǵan. Sóıtse úsh kelin qaıyn atalarynyń týǵan kúnine sondaı tosyn syı jasaýǵa bel býǵanǵa uqsaıdy.

«Qarańyzdarshy, o zamanda bu zaman, kelinniń moınyna mingen qazaqtyń shalyn kórdińizder me? Tipti oqymaǵan sumyraı shaldy kórdińizder me? Joq, sumyraı shaldyń ózi otyrmaıdy ólip ketse de kelinniń moınyna. Qazaqtyń kelini qaıyn atanyń kebisine aıaq suqpaǵan. Eneniń tósegine otyrmaǵan, úlkenniń aldyn kesip ótpegen.... Sony kórgen kishkentaı qyzdar qalaı qabyldaıdy?» - dedi Z.Ahmetova.

«Dúnıeniń bárin biletin Shanshardyń dırektory Ýálıbek soǵan kelgende nege bilmeı qaldy? Nemese anaý Júsip. Ata saqaly aýzyna túsken, nemere súıip otyrǵan jigit. Sol aıtpaı ma? «E, mynaýymyz uıat bolady. Mynaý bizdiń saltymyzǵa tompaq nárse. Mynaý qazaqqa qıanat, bulaı bolmaıdy. Basqasha kúldireıik, meıli ıt bolyp úreıik, shoshqa bolyp qorsyldaıyq. Biraq, mynany istemeıik» dep aıtýǵa bolady ǵoı. Namys joq bizde. Namys bolmaı bara jatyr bizde» - dep oıyn túıindedi jazýshy.